इस्लाम धर्मावलम्वीहरुको महानपर्व बकरईद भोलि परेको छ । बकरईदको अवसरमा भोलि आइतवार एक दिन सरकारले विदा दिएको छ । बाँके जिल्लाका इस्लाम धर्मावलम्वीहरुलाई बकरईद पर्व तयारीका लागि अहिले भ्याई नभ्याई छ । सामूहिक नमाज पढने, मिठोमिठो खाने, नयाँ लुगा लगाउने जोहो गर्न उनीहरुलाई भ्याई नभ्याई भएको हो ।
ईदुलफित्र अर्थात् रमजान पर्वको ७० औँ दिनमा बकरईद पर्व मनाउने गरिन्छ । सामान्यतयाः ३ दिनसम्म मनाइने बकरईदलाई ‘इद–उल–जुहा’ पनि भनिन्छ । यो पर्वलाई बलिदानीका रुपमा लिइएको छ । अल्लाहको आदेशमा इब्राहिमले आफ्ना छोरा इस्माएल अलेह सलामलाई बलिदान गर्न तयार भएको सम्झनामा यो पर्व मनाउन थालिएको मुस्लिक धर्मगुरु मौलाना जब्बार मन्जरीले बताउनुभयो । बकरईद पर्व इस्लाम महिना जुल हिज्जाको दशौँ दिन मनाउने गरिन्छ ।
