नेपालगञ्ज, २६ असार । इस्लाम धर्मावलम्वीहरुको महानपर्व बकरइद आज बाँकेलगायत देशैभर धुमधाम तथा हर्षोल्लासका साथ मनाइदैछ । बकरईदको अवसरमा आज एक दिन सरकारले सार्वजनिक विदा दिएको छ । इदुलफित्र अर्थात् रमजान पर्वको ७० औँ दिनमा बकरईद पर्व मनाउने गरिन्छ ।
सामान्यतयाः ३ दिनसम्म मनाइने बकरइदलाई ‘इद–उल–जुहा’ पनि भनिन्छ । यो पर्वलाई बलिदानीका रुपमा लिइएको छ । अल्लाहको आदेशमा इब्राहिमले आफ्ना छोरा इस्माएल अलेह सलामलाई बलिदान गर्न तयार भएको सम्झनामा यो पर्व मनाउन थालिएको मुस्लिक धर्मगुरु मौलाना जब्बार मन्जरीले बताउनुभयो । बकरइद पर्व इस्लाम महिना जुल हिज्जाको दशौँ दिन मनाउने गरिन्छ ।
बकरइद पर्वका अवसरमा आज बिहान साढे ७ बजे नेपालगञ्जको विपीचोकस्थित इदगाहमा सामूहिक नमाज पढिएको छ । सामूहिक नमाजमा भौतिक पूर्वाधार मन्त्री मोहम्मद इस्तियाक राई सहभागि हुनुहुन्थ्यो । नमाजपछि मन्त्री राईले बकरइद त्याग र बलिदानको पर्व भएकाले देश विकासमा पनि सबैले आआप्mनो तहवाट त्याग र बलिदान गर्नुपर्नेमा जोड दिनुभयो । इदगाहमा नेपालगञ्जका मेयर प्रशान्त विष्ट, उपमेयर कमरुद्दिन राई, निवर्तमान मेयर डा. धवलशम्शेर राणा, नेपालगञ्ज उद्योग बाणिज्य संघका अध्यक्ष अब्दुलवाहिद मन्सुरीलगायतले त्यहा उपस्थित मुस्लिम समुदायलाई बकरइद पर्वको शुभकामना दिनुभएको थियो ।
