नेपालगञ्ज, ४ पुस । भेरी अस्पतालले शिशु मृत्यु घटनाको छानवीन रिपोर्ट बारे जानकारी गराएको छ । अस्पतालमा आज आयोजित पत्रकार सम्मेलनमा मेडिकल सुपरिडेन्टेन्ट डा. निराजन सुवेदीले अस्पतालद्धारा गठित छानवीन समितिको रिपोर्ट सार्वजनिक गर्नुभएको हो ।
गत मंंसिर २८ गते भेरी अस्पतालमा एक नवजात शिशुलाई मृत घोषणा गरिएको थियो । मृत घोषणा गरिएको चार घण्टापछि जीवन संकेत देखिएपछि नेपालगञ्जमै रहेको संजीवनी अस्पतालमा शिशुको उपचार गरिएको थियो । तथापी, शिशुलाई बचाउन भने सकिएन र उनको मंसिर २९ गते मृत्यु भएको थियो । जिउदो शिशुलाई मृत घोष्णा गरिएको घटना मिडियामा सार्वजनिक भएपछि अस्पतालले डा. विवेक महतोको संयोजकत्वमा छानवीन समिति गठन गरेको थियो । छानवीन समितिले शिशु मृत्यु घटना मेडिकल टर्मोलोजीकै एउटा प्याक्टर भएको तर, शिशुका आफन्तसंग उपचारकै शुरुमा पर्याप्त सूचना आदानप्रदान र परामर्श नगरिएको निष्कर्ष निकालेको छ ।
पत्रकार सम्मेलनमा डा सुवेदीले मंसिर २५ गते भर्ना हुन आएकी एक गर्भवती महिला अस्पताल आउँदा पाठेघरको पानीको फोका फुटिसकेको अवस्था रहेको जानकारी गराउनुभयो । सुवेदीका अनुसार, गर्भ अवधि केवल २३ हप्ता पुगेको, भिडियो एक्स–रेमा शिशुको तौल ६१७ ग्राम मात्र देखिएको, मुटुको चाल कमजोर रहेको तथा आमालाई ज्वरो र रगतमा संक्रमणका लक्षण देखिएकाले गर्भावस्थालाई निरन्तरता दिन नसकिने अवस्था थियो ।
जन्मको समयमा शिशुमा जीवनका कुनै संकेत नदेखिएको, गर्भ अवधि २८ हप्ताभन्दा कम र तौल एक हजार ग्राम भन्दा कम भएकाले बाँच्ने सम्भावना अत्यन्त न्यून रहेको निष्कर्षसहित परिवारलाई हस्तान्तरण गरिएको डा. सुवेदीले जानकारी गराउनुभयो । ‘जन्मिएका र अत्यन्तै कम तौल भएका शिशुमा कहिलेकाहीँ श्वासप्रश्वास, मुटुको चाल वा अन्य कुनै पनि जीवनचिन्ह नदेखिने सम्भावना हुन्छ । यो केशमा पनि भएको यही नै हो’ डा. सुवेदीले भन्नुभयो, ‘सस्पेन्डेड एनिमेसन र लाजरस फेनोमेनन जस्ता दुर्लभ अवस्था देखिँदा जीवन संकेत ढिलो गरी देखा पर्न सक्छ ।’ तर, यस्तो जटिल अवस्थाका बारे आफन्तलाई पर्याप्त सञ्चार र परामर्शमा अस्पतालबाट कमजोरी भएपनि उपचार प्रक्रियामा भने कमजोरी नभएको सुवेदीले बताउनुभयो ।
