नेपालगञ्ज, २३ मंसिर । बाँकेको साइनिङ अस्पतालको तथ्यांक अनुसार, गत एक वर्षमा १७४ जना नयाँ कुष्ठरोगी फेला परेका छन् । आईएनएफ नेपालद्वारा बाँकेको जानकी गाउँपालिका वडा नं. ३ मा सञ्चालित उक्त अस्पतालमा गत आर्थिक बर्ष २०८१ं-८२ मा उपचारका लागि आएका विरामी मध्ये १७४ जना नयाँ कुष्ठरोगी निदान भई उपचारका लागि नजिकैको स्वास्थ्य केन्द्रमा रिफर गरिएको अस्पतालका प्रमुख मंगलबहादुर थारुले बताउनुभयो
सो अस्पतालद्धारा आज नेपालगञ्जमा आयोजित सामाजिक परीक्षण तथा जिल्ला परियोजना सल्लाहकार समितिको बैठकमा प्रस्तुत सारांश प्रतिवेदनमा फेला परेका नयाँ कुष्ठरोगी मध्ये बाँकेका ७१ जना, बर्दियाका ४२, भारतका ३०, सुर्खेत ५, दैलेख ३, जाजरकोट ४, दाङ ५, सल्यान २, प्युठान २, रुकुम ३ र सुदुरपश्चिम प्रदेशका ६ जना रहेका छन् । यी मध्ये ४५ प्रतिशतमा कुष्ठरोगको किटाणु पोजिटिभ देखिएको छ । साइनिङ अस्पताल पश्चिम क्षेत्रमा कुष्ठरोगको निदान र उपचारका लागि रेफरल सेन्टरको रुपमा विकास गरिएको हो ।
अस्पतालले बहिरंग सेवामार्फत १८ हजार ९०८ जनालाई सेवा प्रदान गरेको जनाएको छ । जसमा कुष्ठरोग सम्बन्धि समस्या लिएर आएका २ हजार ७८४ तथा छालाजन्य समस्या भएका १६ हजार १२४ जना थिए । अन्तरंगतर्फ १६४ जना विरामीलाई भर्ना गरेर उपचार गरिएको अस्पताल प्रमुख थारुले बताउनुभयो ।
