नेपालगञ्ज, ३ साउन । नेपालगञ्ज वडा नं. १८ मा नेपाली काँग्रेसको पार्टी वडा कार्यालय भवनको निर्माण अहिले दु्रतगतिमा अघि बढिरहेको छ । नेपाली काँग्रेसका पूर्व सभापति, पूर्व प्रधानमन्त्री एवम् संविधानका पिता स्वर्गीय सुशील कोइरालाको स्मृतिमा भवन निर्माण गरिएको हो ।
‘सुशील कोइराला स्मृति भवन’ नाम दिइएको उक्त भवन तीन तल्लाको हुनेछ । तीन तल्ला निर्माणका लागि रु ६० लाख खर्च हुनेछ । प्रारम्भमा पहिलो चरणमा एक तला भवन निर्माण हुनेछ । पहिलो तल्लाका लागि करिब रु २५ लाख रकम विनियोजन गरिएको पार्टी वडा उपसभापति राजाराम सुवेदीले जानकारी दिनुभयो । पहिलो तल्लामा सभापति कोठा एक, कार्यालय सचिव कोठा एक, बैठक कक्ष एक वटा रहने छ ।
भवन निर्माणका लागि पार्टीका क्रियाशिल सदस्य सोही वडा निवासी रामकुमार वर्माले झण्डै रु ४० लाख मूल्य बराबरको साढे आठ धुर जग्गा दान दिनुभएको छ । उपभापति सुवेदीका अनुसार, भवन निर्माणका लागि पार्टी वडा सभापति जगदिश कुर्मीको संयोजकत्वमा निर्माण समिति गठन गरिएको छ । निर्माण समितिमा उपसभापति सुवेदीसमेत रहनुभएको छ । भवन निर्माणका लागि सोही वडा लगायत अन्य स्थानका पार्टी सदस्य तथा शुभचिन्तक तथा नेपाली काँग्रेसवाट जनप्रतिनिधिमा जितेकाहरुले स्वय्रस्फुर्त आर्थिक तथा जिन्सी सहयोग गर्दै आएका छन् ।
सुवेदीका अनुसार, भवन निर्माणका लागि बाँके राप्तीसोनारी गाउँपालिकाका अध्यक्ष तप्त पौडेलले मोरङ्ग, गिट्टी, मख्खन धामीले रु ५० हजार, डा. केशर खनालले रु ११ हजार, नवराज शाहले रु २५ हजार र नयाँराम पौडेलले रु ११ हजार सहयोग गर्नुभएको छ । त्यस्तै का पार्टी अन्य क्रियाशिल सदस्य, साधारण सदस्य तथा शुभेक्छुकहरुवाट पनि भवन निर्माणका लागि निरन्तर सहयोग प्राप्त भइरहेको छ ।
‘भवन निर्माणका लागि एकमुष्ट ठूलो आकारको रकम अहिलेसम्म कतैवाट पाइएको छैन । निर्माण समितिका सदस्यहरुले आप्नो जिम्मेवारीमा उधारोमा आवश्यक सामग्री खरीद गरी भवन निर्माण गरिरहेका छन्’-उपसभापति सुवेदीले भन्नुभयो ।
ठूलो आँकारको रकम जुटाउन केहि साताअघि निर्माण समिति सदस्य उपसभापति सुवेदीले संघीय सरकारको शहरी विकास मन्त्रालयमा भवन निर्माण सहयोगका लागि रकमसहितको प्रपोजल प्रस्तुत गर्नुभएको छ । ‘मन्त्रालयवाट सहयोग गर्ने आश्वासन प्राप्त भएको छ’-सुवेदीले भन्नुभयो ।
संघीय सरकारका साथै प्रदेश र स्थानीय सरकारसंग पनि भवन निर्माणका लागि आर्थिक सहयोगको प्रस्ताव छिटै लिएर जाने बताउदै उपसभापति सुवेदीले यसै आर्थिक वर्षभित्र तीनै तल्ला निर्माण सम्पन्न गर्ने लक्ष्य राखिएको छ भन्नुभयो । ‘तीनै तहका सरकारले हाामीलाई सहयोग गर्छन भन्ने हाम्रो अपेक्षा छ’-उपसभापति सुवेदीको भनाई छ ।
सुवेदीका अनुसार, २०८१ चैत १० गते एक समारोहका बीच ‘सुशील कोइराला स्मृति भवन’ निर्माणको शिलान्यास गरिएको थियो । पार्टीका केन्द्रीय सदस्य मैकुलाल बाल्मीकीले भवनको शिलान्यास गर्नुभएको थियो ।
