नेपालगनञ्ज, ७ असार । बाँकेको राप्तीसोनारी गाउँपालिका अगैयामा ‘राप्तीसोनारी डान्सिङ स्टार २०२५’ को ग्रान्ड फिनाले सम्पन्न भएको छ । डिटु कला केन्द्रको आयोजनामा र राप्तीसोनारी गाउँपालिकाको सहयोगमा भएको कार्यक्रममा ‘कला र कलाकारको सम्मान, समृद्ध राष्ट्रको पहिचान’ भन्ने मूल नारासहित कार्यक्रम सम्पन्न गरिएको थियो ।
प्रमुख आतिथ्य लुम्बिनी प्रदेश सांसद कृष्णा केसी नमुनाले गर्नुभएको कार्यक्रममा कलाकारहरु गायक शिव जिएम, नृत्यांगना भावना वली, सृजना शाही र स्वेता नेपालीको उपस्थिति हुनुहुन्थ्यो ।
प्रतियोगितामा राप्तीसोनारी–८ शम्सेरगन्जका रोमनजन गहतराजले उत्कृष्ट प्रदर्शन गर्दै प्रथम स्थान हासिल गर्नुभयो । त्यस्तै, सोनिया थापा दोस्रो र राप्तीसोनारी–४ बैजापुरका दुर्गा विक तेस्रो तथा चौथो र पाँचौं स्थान क्रमशः निशा चौधरी र रितिका बुढाथोकीले प्राप्त गर्नुभएको थियो । प्रथम, दोश्रो र तृतिय हुनेलाई क्रमशः ५० हजार, ३० हजार र २० हजार नगद पुरस्कार प्रदान गरिएको थियो । लुम्बिनी प्रदेश सभासदस्य केसीले पुरस्कार प्रदान गर्नुभएको थियो ।
गत जेठ ७ गतेदेखि सुरु भएको डान्सिङ आइडलमा सुरुवाती चरणमा १५० जना प्रतिस्पर्धी सहभागी भएका थिए । विभिन्न राउण्ड पार गर्दै २० जना फाइनलमा पुगेका थिए ।
