बर्दिया, ७ असार । बर्दियाको राजापुर नगरपालिका अन्तर्गत विभिन्न विद्यालयका ३१ जना छात्राहरुलाई निशुल्क साइकल वितरण गरिएको छ । यसअघि मधुवन नगरपालिका अन्तर्गतका विभिन्न विद्यालयका १० जना छात्राहरुलाई साइकल वितरण गरिएको थियो ।
प्लान इन्टरनेशनल नेपालको सहयोग र सम्बद्ध नगरपालिकाको समन्वयमा बाँके युनेस्को क्लबद्धारा राजापुर र मधुवन नगरपालिकामा संचालित ‘सुरक्षा परियोजना’ कार्यक्रम अन्तर्गत साइकल वितरण गरिएको हो । आफु अध्ययनरत विद्यालय पुग्न घरवाट कम्तीमा आधा घण्टा पैदल हिडनुपर्ने अवस्थाका छात्राहरुलाई साइकल वितरण गरिएको परियोजना संयोजक ईश्वर विकले जानकारी दिनुभयो ।
संयोजक विकका अनुसार, बर्दियाको राजापुर र मधुवन नगरपालिकामा साढे एक वर्षदेखि सुरक्षा परियोजना कार्यक्रम संचालन हुँदै आएको छ । यो परियोजनाको अवधि तीन वर्षको रहेको छ । परियोजनाले मूलतः छात्राहरुको सशक्तिकरणका विभिन्न आयामहरुमा काम गर्दै आएको छ । बालबलिका बेचबिखन बारे अभिभावक, शिक्षक-शिक्षिका, समुदाय तथा छात्राहरुमा सचेतीकरण अभियान, छात्राहरुको शिक्षा, स्वास्थ्यको सुरक्षालगायतका विषयलाई परियोजनामा समेटिएको छ ।
आज राजपुरको मानपुर टपरा वडा नं. ६ मा आयोजित कार्यक्रममा प्रमुख अतिथि राजापुर नगरपालिकाका उपमेयर मनकलाकुमारी चौधरी, क्लबका प्रमुख संरक्षक प्रवेजअलि सिद्धिकी, अध्यक्ष रबि तुलाधर, बरिष्ठ उपाध्यक्ष पँचम गुरुङ्गलगायतले छात्राहरुलाई साइकल वितरण गर्नुभएको थियो ।
त्यस अवसरमा उपमेयर चौधरीले परियोजना कार्यक्रमले छात्राहरुको व्यक्तित्व विकास र सशक्तिकरणमा ठूलो मद्दत पुग्ने विश्वास व्यक्त गर्दै प्लान इन्टरनेशनल र बाँके युनस्को क्लबलाई धन्यवाद दिनुभयो । उहाँले भन्नुभयो-‘परियोजना कार्यक्रम राम्रो छ । यसको सदुपयोग समुदायस्तरवाट हुनुपर्छ । कार्यक्रमको सफलताका लागि राजापुर नगरपालिकाले सबैखाले सक्दो गर्नेछ ।’
क्लबका अध्यक्ष तुलाधरको अध्यक्षतामा भएको साइकल वितरण कार्यक्रममा राजापुर नगरपालिका वडा नं. ८ का अध्यक्ष राजेश थारुले पनि मन्तव्य व्यक्त गर्नुभएको थियो । कार्यक्रममा वडा नं. ३ का अध्यक्ष प्रसादु थारु, भेरी माविका प्रधानअध्यापक शिवप्रसाद कोइराला, जनचेतना माविका सहायक प्रधानअध्यापक सुवास खत्री, शिक्षक जयश्री दहित, बाँके युनेस्को क्लबका बरिष्ठ सल्लाहकार नीरज गौतम, बर्दिया युनेस्को संघका अध्यक्ष भिमसेन चौधरी, परियोजनाका सुपरभाइजर प्रमिसा थारु, पत्रकार सन्तोष पौडेललगायतको उपस्थिति रहेको थियो ।
