बाँके, ६ असार । बाँकेको डुडुवा गाउँपालिकाले छात्रा प्रोत्साहन कार्यक्रम अन्र्तगत २०८० सालको एसइई उत्तिर्ण गरेका छात्राहरुलाई साइकल वितरण गरेको छ ।
घरदेखि टाढाको विद्यालय गएर उच्च शिक्षा हासिल गर्न सहजता तथा उत्प्रेरणाका लागि गाउँपालिकाका आठ सामुदायिक तथा निजि विद्यालयहरुका ४१ जना छात्राहरुलाई साइकल वितरण गरिएको शिक्षा शाखाका स्रोत व्यक्ति राम एकबाल मण्डलले जानकारी दिनुभयो ।
आज एक कार्यक्रमका बीच पालिका अध्यक्ष नरेन्द्रकुमार चौधरीले छात्राहरुलाई साइकल हस्तान्तरण गर्नुभयो । त्यस अवसरमा अध्यक्ष चौधरीले मूलतः मधेशी समुदायका किशोरीहरु साधारण कक्षा पढेपछि विभिन्न कारणले उच्च शिक्षा हासिल गर्न नसकिरहेको अवस्थालाई दृष्टिगत गरी साइकल वितरण गरिएको बताउनुभयो ।
कार्यक्रममा पालिका उपाध्यक्ष शाहिदा बानो, वडा अध्यक्षद्धय पटेश्वर कुर्मी र आमोद तिवारी, प्रमुख प्रशासकिय अधिकृत अशोककुमार पाण्डेय, शिक्षक, अभिभावक तथा विद्यार्थीहरुको उपस्थिति रहेको थियो ।
डुडुवा गाउँपालिकाले हरेक वर्ष एसइइ पास गर्ने छात्राहरुलाई साइकल वितरण गर्दै आएको छ ।
