नेपालगञ्ज, २२ जेठ । बाँकेको कोहलपुरमा भएको छुट्टाछुट्टै सडक दुर्घटनामा दुई जनाको मृत्यु भएको छ ।
इलाका प्रहरी कार्यालय, कोहलपुरका अनुसार दुर्घटनामा नेपाल टेलिकम कोहलपुरमा कार्यरत ५७ बर्षीय चिरञ्जीवि अधिकारी र फर्मासिष्ट ३६ वर्षीय सरोज मरासिनीको सडक दुर्घटनामा मृत्यु भएको हो । भे ११ प ९७५१ नम्बरको स्कुटीलाई भे १३ प ३२७७ नम्बरको मोटरसाइकलले ठक्कर दिँदा स्कुटीमा सवार गम्भीर घाइते अधिकारीको उपचारको क्रममा कोहलपुर शिक्षण अस्पतालमा मृत्यु भएको थियो ।
स्कुटीको पछाडि बसेकी अधिकारीकी श्रीमती गितादेवी घाइते छिन् । उनको सोही अस्पतालमा उपचार भइरहेको जनाइएको छ ।
यस्तै, कोहलपुर नगरपालिका वडा नम्बर ६ रझेना निवासी मरासिनीको गएराती ११ बजे नेपालगञ्ज मेडिकल कलेज कोहलपुरमा उपचारका क्रममा मृत्यु भएको इलाका प्रहरी कार्यालय कोहलपुरले जनाएको छ ।
राती साढे १० बजे दुर्घटनामा परेर मरासिनी गम्भीर घाइते भएका थिए । त्यसपछि उनलाई उपचारका लागि मेडिकल कलेज लगिएको थियो । चिकित्सकले राती ११ बजे मृत घोषणा गरेका थिए ।
नेपालगञ्जबाट कोहलपुर घर फर्कने क्रममा कोहलपुर नगरपालिका वडा नम्बर १४ हवल्दारपुरमा आफैँले चलाएको भे ९ प ८१५७ नम्वरको मोटरसाइकल अनियन्त्रित हुँदा मरासिनी दुर्घटनामा परेका थिए । दुर्घटनास्थलमा सडक मर्मतका लागि खाडलहरु खनिएको छ । उनी त्यसैमा परेका थिए ।
