नेपालगञ्ज, २१ जेठ । आज नेपालगञ्जमा खैरो हेरोइनसहित दुई जनालाई प्रहरीले पक्राउ गरेको छ । प्रहरीले नेपालगञ्ज उपमहानगरपालिका वडा नं. १४ उदयपुरुवाका ५८ बर्षीय सूरत खटिक र सोही स्थानका १८ बर्षीय सुनिल खटिकलाई १०३ ग्राम ९०० मिलिग्राम खैरो हेरोइनसहित पक्राउ गरेको हो ।
दुबै जनालाई विशेष सुराकीको आधारमा पक्राउ गरी उनीहरुको शरिर खानतलासी गर्दा उक्त परिमाणको खैरो हेरोइन बरामद भएको हो । प्रहरीले उनीहरुबाट एक थान मोबाइल समेत बरामद गरेको छ ।
लागुऔषध नियन्त्रण ब्यूरो नेपालगञ्जको टोलीले उनीहरलाई नियन्त्रणमा लिएको प्रहरी सहायक निरीक्षक नवीनकुमार शाहीले बताउनुभयो । पक्राउ परेका अभियुक्तहरुलाई आवश्यक कारवाहीका लागि जिल्ला प्रहरी कार्यालय बाँकेमा बुझाइएको छ ।
