नेपालगञ्ज, १३ जेठ । बाँके जिल्ला समन्वय समितिका प्रमुख ज्ञानेन्द्रकुमार चौधरीले मानवअधिकारको कार्यान्वयन विभेदकारी नहुनुपर्नेमा जोड दिनुभएको छ ।
राष्ट्रिय मानव अधिकार आयोगको २५औँ (रजत) वार्षिकोत्सवका अवसरमा आज नेपालगञ्जमा भएको कार्यक्रममा चौधरीले भन्नुभयो-‘मानवअधिकार सबैका लागि बराबर हुनुपर्छ । सडकदेखि सदनसम्म, झोपडीदेखि महलसम्म, रोगदेखि भोकसम्म, सानादेखि ठूलासम्म सबै तह र तप्काका लागि मानवअधिकार बराबर हुनुपर्छ ।’
कार्यक्रममा उच्च अदालत तुल्सीपुर—नेपालगञ्जका बरिष्ठतम् न्यायाधिश चन्द्रबहादुर सारुले संयुक्त राष्ट्र संघले राष्ट्रिय मानवअधिकार आयोगको भूमिकालाई ए ग्रेडमा राखेकोमा खुशी व्यक्त गर्दै आयोगले आप्mनो भूमिकालाई थप परिष्कृत गर्दै जानुपर्ने सुझाव दिनुभयो ।
आयोगको नेपालगञ्ज कार्यालयका प्रमुख द्वारिकाकुमारी अधिकारीको अध्यक्षतामा भएको कार्यक्रममा बाँकेका प्रमुख जिल्ला अधिकारी धर्मराज जोशी, बाँकेका प्रहरी प्रमुख प्रहरी उपरीक्षक रामप्रसाद घर्ती, नेपाल पत्रकार महासंघ बाँकेका अध्यक्ष नविन गिरी, इन्सेकका लुम्बिनी प्रदेश संयोजक भोला महत, दलित महिला संघका अध्यक्ष निर्मला सुनारलगायतले आयोगको भूमिकालाई थप कसिलो बनाउदै लानुपर्ने सुझाव दिनुभएको थियो ।
उक्त कार्यक्रमको संचालन आयोगका मानवअधिकार अधिकृत दयाराम पाठकले गर्नुभएको थियो स्वागत मानवअधिकार अधिकृत धनराज शाहीले गर्नुभएको थियो ।
