नेपालगञ्ज, १४ जेठ । बाँकेको राप्तीसोनारी गाउँपालिकामा आजदेखि तीन दिने आधारभूत पत्रकारिता तालिम सुरु भएको छ । राप्तीसोनारी गाउँपालिकाको आर्थिक सहयोगमा नेपाल पत्रकार महासंघ, बाँकेले तालिम आयोजना गरेको हो ।
तालिमको राप्तीसोनारी गाउँपालिका अध्यक्ष तप्तबहादुर पौडेलले उद्घाटन गर्दै स्थानीय तहमै पत्रकार उत्पादन गर्न तालिम सहायक सिद्ध हुने विश्वास व्यक्त गर्नुभयो । अध्यक्ष पौडेलले लोकतान्त्रिक व्यवस्थाप्रति समाजमा नकारात्मक चिन्तन बढिरहेको बताउदै पत्रकारिताका क्षेत्र त्यसखाले प्रवृत्तिका विरुद्ध निर्मम हुनुपर्छ भन्नुभयो ।
त्यस अवसरमा गाउँपालिका उपाध्यक्ष मनिषा सिंहथारु, वडा नं. ७ का अध्यक्ष रामलखन थारु, वडा नं. ८ का अध्यक्ष शालिकराम डाँगी र वडा नंं ९ का अध्यक्ष सोहनलाल थारुले पालिका तहमै पत्रकारिता सिक्न पाउनु स्थानीयका लागि ठूलो अवसर भएकोमा खुशी व्यक्त गर्नुभयो ।
नेपाल पत्रकार महासंघ, बाँकेका अध्यक्ष नवीन गिरीको अध्यक्षतामा भएको तालिम उद्घाटन समारोहमा सचिव कृष्ण ओलीले तालिम आयोजनाको उद्देश्य तथा महत्वमाथि प्रकाश पार्नुभएको थियो ।
आज पहिलो दिनको तालिममा पत्रकार शंकर खनाल र अर्जुन ओलीले प्रशिक्षण दिनुभएको थियो । तालिममा करिब ७० जनाको सहभागिता रहेको छ ।
