नेपालगञ्ज, ९ जेठ । सेवाग्राहीसंग घुस लिएको आरोपमा मालपोत कार्यालय कोहलपुर बाँकेका एक कर्मचारीलाई अख्तियारको टोलीले आज नियन्त्रणमा लिएको छ ।
अख्तियार दुरुपयोग अनुसन्धान आयोगको कार्यालय, बुटवल, सम्पर्क कार्यालय नेपालगञ्जको टोलीले उक्त कार्यालयको मुद्दा फाँटमा कार्यरत खरिदार हरिचन्द्र पाण्डेलाई नियन्त्रणमा लिएको हो ।
जग्गाको मोठ भिडाउने काममा लेखापढी व्यवसायीमार्फत सेवाग्राहीसंग मागेको सूचना एवं उजुरी निवेदनका आधारमा आयोगको टोलीले खरिदार पाण्डेलाई रु २० हजार नगदसहित नियन्त्रणमा लिएको हो । खरिदार पाण्डेले उक्त रकम कोहलपुरस्थित तिवारी रेष्टुरेण्टका संचालक घनश्याम तिवारीलाई राख्न दिएको अवस्थामा अख्तियारको टोलीले नियन्त्रणमा लिएको जनाइएको छ ।
उक्त रकमसहित पाण्डे, लेखापढी व्यवसायी शान्ति पुन र रेष्टुरेण्ट संचालक घनश्याम तिवारीलाई नियन्त्रण लिइएको अख्तियार दुरुपयोग अनुसन्धान आयोगका प्रबक्ता राजेन्द्रप्रसाद पौडेलले जानकारी दिनुभयो ।
