नीरज गौतम/नेपालगञ्ज, ४ जेठ । चलचित्र पत्रकार संघ नेपाल बाँकेले नेपालगञ्जका कलाकर्मी तथा पत्रकारलाई आज सम्मान गरेको छ । संघको २६ औँ बार्षिकोत्सव तथा चलचित्र पत्रकारिता दिवसका अवसरमा नेपालगञ्जमा भएको कार्यक्रममा निर्देशक तथा कोरियोग्राफर नवराज सुवेदी र पत्रकार सावित्री गिरीलाई सम्मान गरिएको हो ।
सुवेदीलाई रु तीन हजार १०० नगद तथा गिरीलाई रु दुई हजार १०० नगदसहित सम्मानपत्र प्रदान गरिएको थियो ।
सुवेदीले दर्जनौं म्युजिक भिडियो र लघु चलचित्र निर्देशन गर्नुभएको छ भने चलचित्र विद्यामा कलम चलाउन थप प्रोत्साहन गर्न पत्रकार गिरीलाई सम्मान गरिएको संघका अध्यक्ष रामचन्द्र पौडेलले बताउनुभयो । सुवेदी र गिरीलाई कार्यक्रमका प्रमुख अतिथि नेपाल पत्रकार महासंघ लुम्बिनी प्रदेश अध्यक्ष शुक्रऋषि चौलागाई, बाँके अध्यक्ष नवीन गिरी, पूर्व अध्यक्ष नीरज गौतम र चलचित्र पत्रकार संघ, बाँकेका अध्यक्ष पौडेलले सम्मान गर्नुभएको थियो ।
कार्यक्रममा नेपाल पत्रकार महासंघ लुम्बिनी प्रदेशका अध्यक्ष चौलागाई, बाँके अध्यक्ष नविन गिरी, पूर्व अध्यक्ष गौतम, संघका सल्लाहकार सुन्दर गुरुङ, सम्माननित व्यक्तित्व सुवेदी र गिरी तथा संघका कोषाध्यक्ष निशु जोशी तथा कार्यवाहक सचिव लक्ष्मी तिमिल्सिनालगायतले बोल्नुभएको थियो ।
त्यस अवसरमा चलचित्र पत्रकार संघ नेपाल बाँके शाखाको संस्थागत विकासमा सहयोग पुर्याउने नेपालगञ्जस्थित सिने रोयल र क्यएफएक्सका पदाधिकारीलाई प्रमाणपत्र प्रदान गरिएको थियो ।
