नीरज गौतम÷नेपालगञ्ज, ६ जेठ । बाँके प्रहरीले एक क्विन्टल गाँजासहित चार जनालाई पक्राउ गरेको छ ।
लागुऔषध नियन्त्रण ब्यूरो नेपालगञ्ज शाखा कार्यालय र जिल्ला प्रहरी कार्यालय, बाँकेको संयुक्त टोलीले डुडुवा गाउँपालिका वडा नं. ४ का ५० वर्षीय भागिराम खटिकको घरवाट १११ किलो ४०६ ग्राम गाँजा बरामद गरेको हो ।
यसअघि प्रहरी टोलीले नेपालगञ्ज वडा नं. १४ का १७ वर्षीय विनय सोनी, वडा नं. २२ का १६ वर्षीय आदर्श साहान र वडा नं. ६ का २१ वर्षीय दिपेश चौरासियावाट दुई किलो ३५० ग्राम गाँजा बरामद गरेको थियो । उनीहरुकै वयानका आधारमा खटिकको घर खानतलासी गर्दा ठूलो परिणामको थप गाँजा बरामद भएको जनाइएको छ ।
यसैबीच, बाँके प्रहरीले नेपालगञ्को सीमानाका जमुनहा नजिकवाट एक ग्राम ३३० मिलिग्राम खैरो हेरोइनसहित कोहलपुर नगरपालिका वडा न.. ११ का ३४ वर्षीय चन्द्रबहादुर गन्धर्व र सोही वडाका २७ वर्षीय सौरभ टमाटालाई पक्राउ गरेको छ ।
यसैगरी प्रहरीले जुम्ला चन्दननाथ नगरपालिका वडा नं. १० का २१ वर्षीय आशिष न्यौपानेलाई प्रतिबन्धित लागुऔषध ट्रामाडोल ५० ट्याबलेट र नाइट्रोभ्याट ७० ट्याबलेटसहित जमुनाहा नाकावाट पक्राउ गरेको छ ।
लागुऔषधसहित पक्राउ परेका सबै अभियुक्तमाथि थप अनुसन्धान भइरहेको बाँके प्रहरीले जनाएको छ ।
