नेपालगञ्ज, २० बैशाख । बाँकेको कोहलपुर नगरपालिकामा आजदेखि जग्गाधनी प्रमाणपत्र वितरण कार्यक्रम सुरु गरिएको छ । भूमि व्यवस्था, सहकारी तथा गरिबी निवारण मन्त्री बलराम अधिकारीले सो नगरपालिकाका वडा नम्बर १ का भूमिहीन दलित खडके दमाईलाई प्रमाणपत्र हस्तान्तरण गरेर उक्त कार्यक्रमको शुरुवात गर्नुभएको हो ।
कोहलपुर नगरपालिका प्रमुख पूर्णप्रसाद आचार्यका अनुसार, पहिलो चरणमा ७१ जना भूमिहीन, दलित सुकुमबासीले जग्गाधनी प्रमाणपूर्जा पाएका छन् ।
कार्यक्रममा मन्त्री अधिकारीले जग्गा सम्बन्धित व्यक्तिको नभई अन्यको भएको पाइए पूर्जा जफतका साथै दोषीलाई कडा कारबाही गरिने चेतावनी दिनुभयो । मन्त्री अधिकारीले भूमिहीन सुकुमबासी र भूमिहीन दलितलाई जग्गा प्राप्तिमा कुनै शुल्क नलाग्ने जानकारीसमेत दिनुभयो ।
सुकुम्बासी समस्या समाधान आयोगका केन्द्रीय अध्यक्ष हरि रिजालले सरकार सुकुम्बासी समस्या समाधानका लागि कटिबद्ध रहेको बताउनुभयो ।
भूमि समस्या समाधान आयोग बाँकेका अध्यक्ष घननाथ खनालको अध्यक्षतामा भएको कार्यक्रममा प्रतिनिधिसभाका सदस्य सूर्य ढकाल, लुम्बिनी प्रदेशका सामाजिक विकास मन्त्री जन्मजय तिमिल्सिना, कोहलपुर नगरपालिका प्रमुख आचार्य उपप्रमुख संगिता सुवेदीलगायतले जग्गाधनी प्रमाणपूर्जा वितरणलाई छिटोछरिटो तथा थप सहज बनाउनुपर्नेमा जोड दिनुभयो ।
बाँकेमा जग्गाधनी प्रमाणपूर्जा पाउन हालसम्म करिब ५४ हजार आवेदन परेको छ । आयोगले भने चालू आर्थिक वर्ष २०८१÷०८२ मा ६ हजार प्रमाणपत्र वितरण गर्ने लक्ष्या निर्धारण गरेको छ ।
