नेपालगञ्ज, २० बैशाख । “नयाँ साहसिक संसारमा रिपोर्टिङः प्रेस स्वतन्त्रता र मिडियामा कृत्रिम बुद्धिमत्ता (एआई) को प्रभाव” भन्ने मूल नाराका साथ ३२औं विश्व प्रेस स्वतन्त्रता दिवस आव नेपालगञ्जमा पनि प्रभातफेरी र स्वास्थ्य परीक्षण शिविर आयोजना गरि मनाइएको छ । नेपाल पत्रकार महासंघ बाँकेले प्रभातफेरी र पत्रकारहरुको स्वास्थ्य परीक्षण शिविरको आयोजना गरेको हो ।
नेपालगञ्जको न्यूरोडस्थित सेतु विक चोकवाट शुरु भएको प्रभातफेरी बसपार्क नजिक रहेको महासंघको कार्यालयमा पुगेर समापन गरिएको थियो । प्रभातफेरीमा महासंघ बाँकेका अध्यक्ष नवीन गिरी, पूर्व अध्यक्षहरु नीरज गौतम, झलक गैरे, प्रेम केसी, रुद्र सुवेदीलगायत बाँकेका क्रियाशिल पत्रकारहरुको सहभागिता रहेको थियो ।
प्रभातफेरी पश्चात महासंघको कार्यालयमा गरिएको नसर्ने रोग सम्बन्धि निःशुल्क स्वास्थ्य परीक्षण शिविरमा ५० बढी पत्रकारहरुको रक्तचाप, मृगौला र ब्लडसुगरको जाँच गरिएको थियो । निशुल्क स्वास्थ्य परीक्षण शिविरमा नेपालगञ्ज उपमहानगरपालिका र शिखर हेल्थ केयर एण्ड डाइग्नोष्टिक सेन्टर नेपालगञ्जले सघाएको अध्यक्ष नवीन गिरीले बताउनुभयो ।
नेपालगञ्ज उपमहानगरपालिका स्वास्थ्य महाशाखाका जनस्वास्थ्य निरीक्षक एवम् नसर्ने रोग फोकलपर्सन राजन शाही, हेल्थ असिस्टेन्ट सन्देश शाही, ल्याब टेक्निसियन गणेश थारु र अहेब शालिकराम कश्यपलगायतको स्वास्थ्यकर्मीहरुको टोलीले पत्रकारहरुको स्वास्थ्य परीक्षण गर्नुभएको थियो ।
