नेपालगञ्ज, २५ बैशाख । नेपालगञ्जस्थित यातायात व्यवस्था कार्यालयमा भ्रष्टाचारबिरुद्ध धर्नासहितको शुद्धिकरण कार्यक्रम गरिएको छ ।
कार्यालयबाट प्रवाह गरिने सेवा, सुबिधा र त्यसको प्रभावकारिताको माग गर्दै बागेश्वरी असल शासन क्लब (बास) ले शुद्धिकरण कार्यक्रम गरेको हो ।
उक्त कार्यक्रममा भ्रष्टाचारबिरुद्ध सांकेतिक दबाब स्वरुप कार्यालयको प्रागंणमा आज बिहान १० बजेदेखि आधा घण्टा धर्ना दिइएको बासका कार्यकारी निर्देशक नमस्कार शाहले जानकारी दिनुभयो ।
धर्नापछि यातायात कार्यालयका प्रमुख रमेश बुढाथोकीलाई बासका केन्द्रीय सचिव जोशिना थारुले १३ बुँदे ज्ञापनपत्र बुझाउनुभएको थियो । ज्ञापनपत्रमा कार्यालयबाट प्रवाह भइरहेका सेवाहरु निष्पक्ष, पारदर्शी, भ्रष्टाचाररहित हुनुपर्ने लगातका बुँदा समेटिएको छ ।
भ्रष्टाचार नियन्त्रण, सरकारी साधनहरुको दुरुपयोगमा रोक, नागरिक गुनासोको सुनुवाई, नियमितरुपमा सार्बजनिक सुनुवाईको व्यवस्था, भ्रष्टाचार बिरुद्धका उजुरीहरुको सुनुवाई तत्काल गरिनुपर्ने लगायतका बुँदा ज्ञापनपत्रमा उल्लेख गरिएका छन् ।
