नेपालगञ्ज, ७ चैत । नेपालगञ्जवाट सशस्त्र प्रहरीले आज बिहान ठूलो परिमाणमा विभिन्न कम्पनीका मोबाइल डिस्प्ले बरामद गरेको छ । सशस्त्र प्रहरी बल नं. ३० गण बागेश्वरीवाट खटिएको टोलीले ५७० थान मोबाइल डिस्प्ले बरामद गरेको हो ।
भारतबाट थोरैथोरै संख्यामा ल्याएर भण्डार गरी एकैपटक ठूलो परिमाण बनाएर नेपालगञ्जबाट अन्यत्र लैजाँदै गरिएको अवस्थामा आइफोन, वान प्लस लगायतका स्मार्ट फोनका डिस्प्ले सशस्त्र प्रहरीले बरामद गरेको बताइएको छ ।
बरामद गरिएका एउटा डिस्प्लेको रु ३ हजारदेखि रु ३५ सयसम्म पर्ने गर्दछ । उक्त परिमाण अनुसार सशस्त्र प्रहरीले करीब १७ लाख १० हजार बराबरको डिस्प्ले बरामद गरेको हो ।
बरामद गरिएका डिस्प्ले नेपालगञ्ज भन्सार कार्यालयमा बुझाइएको छ ।
