नेपालगञ्ज, ८ चैत । ‘स्वास्थ्यका लागि प्रातःकालीन हिँडाई’ भन्ने मूल नारासहित भोलि शनिवार नेपालगन्जमा वाकाथनको आयोजना गरिएको छ ।
वाकाथनमा स्वास्थ्य तथा जनसंख्या मन्त्री प्रदीप पौडेल प्रमुख अतिथिका रुपमा सहभागि हुने कार्यक्रम रहेको छ । मन्त्री पौडेल आज साँझ काठमाडौंवाट नेपालगञ्ज नेपालगञ्ज आउदै हुनुहुन्छ ।
कार्यक्रम संयोजक डा. किशोर खत्रीका अनुसार, भोलि शनिवार विहान साढे ६ बजे गणेशमान चोक नजिकै रहेको नेपाल चिकित्सक संघ, भेरी शाखाबाट सुरु हुने वाकाथन नेपालगञ्जको परिक्रमापछि पुनः गणेशमान चोकमा पुगेर समापन गरिनेछ ।
‘स्वास्थ्य सचेतना विस्तार गर्ने तथा नेपालगञ्जको पर्यटकीय स्थलहरुको प्रबद्र्धन गर्ने र आम नेपाली दाजुभाई, दिदिवहिनीहरुलाई एकताको मालामा गाँस्ने उद्देश्यले वाकाथनको आयोजना गरिएको हो’–कार्यक्रम संयोजक डा. खत्रीले भन्नुभयो । बालरोग विशेषज्ञ डा. खत्री वाकाथानलाई अभियानकै रुपमा लिएर लामो समयदेखि देश दौडाहामा हिडिरहनुभएको छ ।
वाकाथनमा सहभागिपछि नेपाली काँग्रेसका केन्द्रीयसदस्य समेत रहनुभएका मन्त्री पौडेल भोलि शनिवार नै विहान साढे ८ बजे बाँके पार्टी कार्यालयमा आयोजना हुने कार्यकर्ता भेटघाट कार्यक्रममा सहभागि हुनुहुनेछ ।
कार्यकर्ता भेटघाटमा मुलुकको समसामयिक राजनीति, पार्टी संगठन, बाँके जिल्लाको वस्तुगत अवस्थालगायतका विषयमा छलफल हुने काँग्रेस बाँकेका सभापति नारायणप्रसाद गौडेलले बताउनुभयो ।
