नेपालगञ्ज, ३ चैत । बाँके प्रहरीले गत फागुन महिनामा ६५ फरार प्रतिवादी पक्राउ गरेको छ । जिल्ला प्रहरी कार्यालय, बाँकेले आज नेपालगञ्जमा गरेको नियमित पत्रकार सम्मेलनमा उक्त जानकारी दिइएको हो ।
पत्रकार सम्मेलनमा जिल्ला प्रहरी प्रवक्ता प्रहरी नायब उपरीक्षक दिपक पातलीले पक्राउ परेका सबै प्रतिवादीलाई जिल्ला अदालत बाँकेमा बुझाएको बताउनुभयो ।
उहाँका अनुसार, पक्राउ परेका फरार प्रतिवादीबाट १५ बर्ष दुई महिना १८ दिन कैद र रु चार लाख ३५ हजार जरीवाना असूल उपर गरिएको छ ।
त्यस्तै बाँके प्रहरीले फागुन महिनामा नेपालगञ्जबाट बरामद गरेको रु १४ लाख ७१ हजार बराबरको अबैध भन्सार छलीको सामान भंसार कार्यालयमा बुझाएको छ । सोही अवधिमा अबैध नदीजन्य पदार्थ उत्खनन् गर्ने चार टिप्पर र दुई थान ट्याक्टर नियन्त्रणमा लिइएको छ ।
यसैगरी, जिल्ला प्रहरी कार्यालयमा फागुन महिनामा दर्ता भएका १३१ मुद्दातर्फ १०२ जनालाई पक्राउ गरेर कानूनी दायरामा ल्याइएको छ भने ६५ वटा पेण्डिङ रहेका मुद्दाहरु फछ्र्यौट भएका छन् । ठाडो उजुरी ४१४ मध्ये ३९६ उजुरी फछ्र्यौट भएको र १४ वटा प्रक्रियामा रहेको छ ।
बाँके प्रहरी प्रमुख प्रहरी उपरीक्षक तुलबहादुर कार्कीको प्रमुख उपस्थितिमा भएको पत्रकार सम्मेलनमा फागुन महिनामा जिल्लाभरमा गरिएका ट्राफिक कारबाहीमा तीन हजार ६१४ सवारीसाधनलाई कारबाही गरिएको जनाइएको छ ।
