नेपालगञ्ज, २ चैत । । ‘स्वच्छ र प्रतिस्पर्धी बजारः उपभोक्ता संरक्षण दिगो आधार’ भन्ने नाराका साथ विश्व उपभोक्ता अधिकार संरक्षण दिवस मनाइएको छ ।
दिवसका अवसरमा वाणिज्य, आपूर्ति तथा उपभोक्ता संरक्षण कार्यालय बाँकेले आज नेपालगञ्जमा आयोजना गरेको कार्यक्रममा सहभागि सरोकारवालाहरुले उपभोक्ताको स्वास्थ्यमाथि गम्भीर असर गर्ने गरी उपभोक्ताको अधिकार हनन गर्नेहरुलाई कारबाहीको दायरामा ल्याउन नियामक निकायको भूमिका प्रभावकारी देखिनुपर्ने सुझाव दिएको छन् ।
नियामक निकायले बेलाबखत अनुगमन गर्ने तथा कारबाही पनि गरिरहेको, तर उपभोक्ता ठगिने प्रवृत्ति भने नरोकिएकोमा सहभागिहरुले कार्यक्रममा चिन्ता समेत व्यक्त गरेका छन् ।
कार्यक्रममा नेपालगञ्जका कार्यवाहक मेयर कमरुद्दिन राइले उपभोक्ता अधिकार संरक्षणका सवालमा स्थानीय सरकार जिम्मेवार र प्रतिवद्व रहेको दावी गर्नुभयो ।
त्यस अवसरमा नाप तौल बिभाग नेपालगञ्ज प्रमुख सन्तोष शर्मा, राष्ट्रिय मानवअधिकार आयोग नेपालगञ्ज प्रमुख द्वारिका अधिकारी, खाद्य प्रविधि तथा गुण नियन्त्रण कार्यालय नेपालगञ्जका खाद्य निरीक्षक एकराज बुढाथोकीलगायतले पनि बोल्नुभएको थियो ।
