नेपालगञ्ज, ११ फागुन । नेपाली कांग्रेसका बरिष्ठ नेता डा. शेखर कोइरालाले सरकार सञ्चालनका लागि छुट्टै राजनीतिक संयन्त्र निर्माण गर्नु ठिक नभएको बताउनुभएको छ ।
बाँकेको मदुईमा आज आयोजित नेपाली कांग्रेस राप्तीसोनारी गाउँपालिकाको तेस्रो सम्मेलनमा बरिष्ठ नेता कोइरालाले सत्ता साझेदार राजनीतिक दलवाट सरकार सञ्चालनको अभ्यास लोकतान्त्रिक हुनैसक्दैन भन्नुभयो ।
बरिष्ठ नेता कोइरालाले भन्नुभयो-‘सरकारका मन्त्री तथा अन्य ओहादामा रहेकोहरुले सत्ता सञ्चालनमा एमालेसंग सहकार्य गर्ने र बाहिर रहेका कार्यकर्ता पंक्तिले भने उनीहरुलाई खबरदारी गरिरहनुपर्छ ।’
पार्टीभित्र सहमति, सहकार्य र एकता अपरिहार्य भएकोमा जोड दिदै उहाँले अब पार्टीभित्रको गुटहरु अन्त्य गरेर नेता तथा कार्यकर्ताहरु एक हुन जरुरी छ भन्नुभयो ।
सम्मेलनमा केन्द्रीय सदस्यद्वय सञ्जय गौतम र दिनेश कोइराला, लुम्बिनी प्रदेश महामन्त्री विक्रम खनाल, कोशी प्रदेशका पूर्व मुख्यमन्त्री केदार कार्की, कांग्रेस बाँकेका सभापति नारायणप्रसाद गौडेल, क्षेत्रीय समापति पोषण केसी, महासमिति सदस्य महाबीर ओली, महाधिवेशन प्रतिनिधि लाहुराम थारु, राप्तीसोनारी गाउँपालिकाका अध्यक्ष तप्त पौडेललगायतले बोल्नुभएको थियो ।
सम्मेलन राप्तीसोनारी गाउँपालिका सभापति भिमबहादुर रानाक्षेत्रीको सभापतित्वमा सम्पन्न भएको थियो ।
