नेपालगञ्ज, ९ फागुन । यही फागुन १९ गतेदेखि नेपालगञ्ज रंगशालामा हुने अन्तर्राष्ट्रिय आमन्त्रणको लुम्बिनी कप महिला फुटबल प्रतियोगिताको तयारी द्रुतगतिमा अघि बढाइएको छ ।
प्रतियोगिता उद्घाटनको झण्डै १० दिन बाँकी भएको अवस्थामा प्राथमिकताका आधारमा कामको गतिलाई दु्रतगतिमा अघि बढाइएको आयोजक अन्तरालका प्रमुख कार्यकारी जयनारायण शाहले बताउनुभयो ।
प्रमुख कार्यकारी शाहका अनसार यसअघि भएका प्रतियोगिताका कारण धुलाम्मे भएको फुटबल ग्राउण्डमा अहिले पानी चहार्ने काम भइरहेको छ । ‘उहाँले भन्नुभयो—‘ग्राउण्डमा अहिले सबैखाले खेल प्रतियोगिता तथा अभ्यासका कार्यक्रम रोकिएका छन् ।’
यसैगरी, नेपालगञ्ज रंगशालाको प्याराफिटको मर्मत सम्भार, रंगरोगन, विद्युतिकरणमा सुधर, सरसफाई लगायतका कामलाई पनि द्रुतगति भइरहेको छ ।
बाँके जिल्ला फुटबल संघको सहकार्यमा अन्तरालले आयोजना गर्ने लुम्बिनी कप महिला फुटबल प्रतियोगितामा नेपाल र भारतका गरी आठ टीमको सहभागिता हुने जनाइएको छ ।
प्रतियोगिताको लोगो यसअघि नै सार्वजनिक भइरहेको छ भने प्रतियोगितालाई व्यवस्थितरुपमा सम्पन्न गर्न गठन गरिएका विभिन्न उपसमितिहरुले पनि आप्नो कामलाई तिव्रता दिएका छन् ।
यसैगरी, लुम्बिनी कप महिला फुटबल प्रतियोगिता नजिकिएसंगै यसका तयारीका बारे केन्द्रदेखि जिल्ला तहसम्मका विशिष्ट व्यक्तिले चासो समेत व्यक्त गर्न थालेका छन् ।
संघीय सरकारका पूर्व खेलकुद मन्त्री महेश्वर गहतराज अथक, बाँके क्षेत्र नं. ३ वाट निर्वाचित संघीय सांसद किशोरसिंह राठौर, लुम्बिनी प्रदेश सांसद कृष्णा केसी नमूना, सांसद दीपा शर्मा, नेपालगञ्ज उपमहानगरपालिकाका मेयर प्रशान्त विष्ट, राष्ट्रिय मानवअधिकार आयोगका पूर्व प्रवक्ता मोहना अन्सारीलगायतका विशिष्ट व्यक्तिहरुले प्रतियोगिता तयारीको अनुगमन गर्दै सहयोगको प्रतिबद्धतासमेत जनाएका छन्
यस्तै, नेपाली कांग्रेस, बाँकेका सचिव सुधांशु कोइराला, नेकपा माओवादी केन्द्र लुम्बिनी प्रदेश कमिटी सदस्य रतन शाही, राष्ट्रिय प्रजातन्त्र पार्टीका अध्यक्ष नरेन्द्र पौडेल, निमित्त सचिव रुद्रमणि न्यौपाने, राष्ट्रिय प्रजातन्त्र पार्टी नेपालका अध्यक्ष दिपेन्द्रबहादुर सिंह र नेपाली कांग्रेसका कोषाध्यक्ष यज्ञ बस्नेतले पनि प्रतियोगिता तयारीको स्थलगत अवलोकन गर्नुभएको छ ।
प्रतियोगिता आयोजनाकै सन्दर्भमा जिल्लास्थित विभिन्न पेशगत संघ, संगठनहरुसंग समन्वयात्मक बैठकसमेत हुने गरेको छ । सोही क्रममा गैरसरकारी संस्था महासंघ, सूचना र मानव अधिकार अनुसन्धान केन्द्र, फातिमा फाउण्डेशन, बहुमुखी सेवा केन्द्र, गैरसरकारी संस्था महासंघ, सामुहिक अभियान नेपाल, नेपालगञ्ज उपमहानगरपालिका शिक्षा महाशाखा, प्याब्सन, बाँके खेलकुद महासंघ, बाके लगायत संघ, संगठनहरुसंग बैठक बसि प्रतियोगिता सफल बनाउन आपसी सहयोगका सन्दर्भमा छलफल भएको प्रतियोगिता मिडिया संयोजक नीरज गौतमले जानकारी दिनुभयो ।
