नेपालगञ्ज, ७ माघ । बाँकेका राप्तीसोनारी गाउँपालिका वडा नं. २ राजपुरका किसानहरु जंगली जनावरका कारण आर्थिक र मानसिक समस्यामा परेका छन् ।
युएसएडको सहयोग र द एसिया फाउन्डेशन मु्ख्य कार्यान्वयन संस्था रहेको युएसएड नागरिक समाज तथा सञ्चार कार्यक्रमको साझेदारीमा नेपालगञ्जस्थित समुदायका लागि सञ्चार अभियान नेपाल (सीसीएन) मार्फत् संचालित ‘वातावरणीय न्याय र जवाफदेहिताका लागि सीमान्तकृत समुदायको सबलीकरण अभियान अन्तर्गत आज आयोजना गरिएको ‘गोलघर सम्वाद’ कार्यक्रमका सहभागीले आप्नो समस्या बताएका हुन् ।
राजपुरमा दिनहुँजसो बाघ, बाँदर, निलगाई र बँदेलले उनीहरुलाई दुःख दिने गरेको छ । जंगली जनावरले बाली र पशुचौपायामा ठूलो क्षति पुगिरहेको किसानहरुको गुनासो छ । ‘जंगली जनावरका कारण बर्षौदेखि हामीहरु हैरानीमा परेका छौ, तर, हाम्रो दुःखेसो सुनिदिने र बुझिदिने कोही पनि भएनन्’—स्थानीय खड्कबहादुर ओलीले गुनासो पोख्नुभयो ।
‘बाघले खोरबाटै बाख्रालगायत पशुचौपाया तानेर लाग्छ । समस्या लिएर गाउँपालिका र राष्ट्रिय निकुञ्जमा गयो भने कसैले सुन्दैनन् । राहतका लागि निवेदन दिन निकुञ्ज जाँदा स्थायी लेखा नम्बर मागिन्छ’—किसानहरुको गुनासो छ ।
कार्यक्रमका सहजकर्ता प्रकाश उपाध्यायले वन्यजन्तुबाट हुने क्षतिको राहत निर्देशिका २०८० र बीमा प्रक्रियाबारे जानकारी गराउँदै समस्या समाधानका लागि सामूहिक प्रयासमा जोड दिनुभयो । सीसीएनका कार्यकारी निर्देशक तुला अधिकारीले वन्यजन्तु र मानवबीचको द्वन्द्व न्यूनिकरण र क्षतिपूर्ति प्राप्तिका लागि सबै पक्षबीच साझा समन्वय बढाउन यो अभियान सुरु गरिएको बताउनुभयो ।
बर्दियाको मधुवन नगरपालिकाको वडा नम्बर २ र बाँकेको राप्तीसोनारी गाउँपालिका वडा नम्बर २ मा अभियान सञ्चालन गरिएको बताइएको छ ।
