नेपालगञ्ज, २३ पुस । बाँकेको बिपी मार्गमा नेपाली कांग्रेस क्षेत्र नम्बर १ ले पदयात्रा शुरु गरेको छ । राष्ट्रिय एकता तथा मेलमिलाप दिवसका अवसर पारेर आज र भोलि दुई दिनको पदयात्रा शुरु गरिएको हो ।
बाँकेको कोहलपुर खड्कवार हुँदै सल्यान घुइँयावारी जोड्ने उक्त सडकको प्रथम जननिर्वाचित प्रधानमन्त्री स्व. वीपी कोइरालावाट शिलान्यासको तयारी गरिएको थियो । तर, राजा महेन्द्रले वि.सं. २०१७ साल पुस १ गते ‘कु’ गरेसँगै सडक निर्माणको अघि बढ्दन सकेन् ।
खड्कवार–घुइँयावारी सडकका लागि छुट्याइएको बजेटले बबई–छिन्छु–सुर्खेत सडक निर्माण भयो । तर, अहिलेसम्म कोहलपुरको खड्कवार हुँदै सल्यान घुइँयावारी जोड्ने उक्त सडक निर्माणले पूर्णता पाउन सकेको छैन । यो मार्ग सल्यान—कोहलपुर आउजाउका लागि निकै चलनचल्तीको मानिएको छ । खड्कवार हुँदै सल्यान घुइँयावारीको दुरी २० किलोमिटर भन्दा कम रहेको नेपाली कांग्रेस बाँके क्षेत्र नं. एक का सभापति पोषण केसीले जानकारी दिनुभयो ।
पदयात्रामा शुभारम्भ कार्यक्रममा कांग्रेसको एक सय दिने केन्द्रीय अभियानका बाँके जिल्ला प्रतिनिधि एवम् केन्द्रीय सदस्य कृष्णकिशोर शर्मा घिमिरे, बाँके सभापति नारायणप्रसाद गौडेल, लुम्बिनी प्रदेश सदस्य टेकनारायण भुसाल, जिल्ला सचिव सुधांशु कोइराला लगायत करीब ३० जना नेता कार्यकर्ताहरू सहभागी हुनुहुन्छ ।
