नेपालगञ्ज, २३ पुस । नेपालगञ्ज उपमहानगरपालिका अन्तर्गतको लैँगिक समानता तथा सामाजिक समावेशीकरणको परीक्षण नतिजा सार्वजनिक गरिएको छ । बागेश्वरी असल शासन क्लब (बास) नेपालको सहजीकरणमा गरिएको परीक्षण नतिजा सार्वजनिक गरिएको हो ।
उपमहानगरपालिका अन्तर्गतको लैँगिक समानता तथा सामाजिक समावेशीकरण कार्यक्रमले गत आर्थिक वर्ष २०८०÷०८१ को परीक्षण नतिजामा ६३ दशमलव पाँच प्राप्त गरेको छ । कूल प्राप्तांक मध्ये सुशासन र उत्तरदायित्वमा सबैभन्दा बढी १४ दशमलव पाँच, मानव तथा क्षमता विकासमा १३, संस्थागत व्यवस्थामा १२, सेवा प्रवाहमा १२ दशमलव पाँच र कानुन तथा योजनामा ११ दशमलव पाँच अंक प्राप्त गरेको छ ।
नतिजा सार्वजनिक कार्यक्रममा उपमहानगरपालिकाका प्रमुख प्रशासकिय अधिकृत ओमबहादुर खड्काले कतिपय विषयमा नीतिगत रुपमै सुधार गर्नुपर्ने आवश्यकता औल्याउनुभयो ।
त्यस अवसरमा महिला, बालबालिका तथा ज्येष्ठ नागरिक शाखा प्रमुख मञ्जु पाण्डे, युवा, शिक्षा शाखा तथा खेल्कुद महाशाखा प्रमुख गोर्खबहादुर थापा, बासका कार्यकारी निर्देशक नमस्कार शाह, कार्यक्रम प्रबन्धक मन भण्डारी लगायतले बोल्नुभएको थियो ।
२०८१÷०९÷२३
