कोहलपुर(बाँके), २२ पुस । बाँकेको कोहलपुर नगरपालिकाले नगर क्षेत्रमा कार्यरत गैरसरकारी संस्थाहरुको सहकार्यलाई थप प्रभावकारी बनाउँदै लैजाने भएको छ ।
नगर कार्यपालिकाको कार्यालय सामाजिक विकास समितिले आज आयोजना गरेको कोहलपुर क्षेत्रका क्रियाशील संघसंस्थाहरुको समन्वयात्मक बैठकमा संस्थागत सहकार्यलाई थप प्रभावकारी बनाउदै लैजाने निष्कर्ष निकालेको छ ।
बैठकमा रोजगार शाखा प्रमुख एवम् फोकलपर्सन आशिष वर्माले कोहलपुर कार्य क्षेत्र भएका संघसंस्थाहरुका बीच संवादको थालनी गर्ने र संस्थाहरुको साझेदारीका साँझा प्रयाससमेत प्रारम्भ भएको बताउनुभयो ।
समन्वयात्मक बैठकमा प्रमुख प्रशासकीय अधिकृत मानबहादुर गिरीले गैरसरकारी संस्थाको बजेटमा अब एकद्वार प्रणाली कायम गर्न जरुरी भइसकेको छ भन्नुभयो ।
सामाजिक विकास तथा दर्ता शाखा प्रमुख वीरबहादुर बिकले सहजीकरण गर्नुभएको बैठकमा वडा नं. १० का अध्यक्ष गौरा भट्टराई, कार्यपालिका सदस्य भूपबहादुर दर्जी लगायतको सहभागिता रहेको थियो ।
