नेपालगञ्ज, १० पुस । नेपालगञ्ज रंगशालामा मेयर कप फुटबल प्रतियोगिता हुने भएको छ । प्रतियोगिता आगामी माघ पाँच गतेदेखि हुने आयोजक बाँके जिल्ला फुटबल संघका अध्यक्ष भोजराज शाहीले जानकारी दिनुभयो ।
संघका अध्यक्ष शाहीको अध्यक्षतामा बसेको बैठकले माघ महिनामा जिल्लास्तरीय मेयर कप फुटबल प्रतियोगिता गर्ने निर्णय गरेको हो । शाहीका अनुसार, यस पटक महिला र पुरुषको प्रतियोगिता छुट्टाछुट्टै मितिमा आयोजना गर्न लागिएको छ ।
प्रतियोगितामा बाँकेका आठ स्थानीय तहका निजि तथा सामुदायिक विद्यालयहरुको सहभागिता रहने छ । विद्यालयस्तरको प्रतियोगिताले नयाँ खेलाडीलाई अवसर प्रदान गर्ने अध्यक्ष शाहीले बताउनु भयो ।
मेयर कप फुटबल प्रतियोगितामा उत्कृष्ट खेलाडी छनोट गरेर अन्य जिल्लासँग मैत्रीपुर्ण खेल खेलाइने संघको योजना रहेको छ ।
गत वर्ष पनि मेयर कपको उत्कृष्ट खेलाडीहरुले कैलालीसँग मैत्रीपूर्ण खेल खेलेको थियो । मेयर कप फुटबल प्रतियोगितामा करिब ५० विद्यालयको सहभागिता रहने संघले प्रारम्भिक आँकलन गरेको छ ।
