नेपालगञ्ज, पुस ९ गते । लुम्बिनी कप महिला फुटवल प्रतियोगिता आगामी फागुन १९ गतेदेखि नेपालगञ्जमा हुने भएको छ ।
अन्तरालको आयोजना र बाँके जिल्ला फुटवल संघको सहकार्यमा नेपालगञ्जस्थित महेन्द्र रंगशालामा हुने उक्त फुटवलमा नेपाल र छिमेकी मित्र राष्ट्र भारतका ८ टिम सहभागी हुनेछन् । प्रतियोगिता आयोजनाको तयारी शुरु भइसकेको अन्तरालका प्रमुख कार्यकारी जयनारायण शाहले जानकारी दिनुभयो ।
अखिल नेपाल फुटवल संघ (एन्फा) ले आयोजकलाई आज सोमवार पत्रमार्फत लुम्बिनी कप महिला फुटवल संचालनका लागि २०८१ फागुन १९ देखि २९ गतेको समय दिएको छ ।
प्रतियोगिताका लागि गत मंसिर १६ गते नेपाली महिला फुटवल राष्ट्रिय टिमकी पहिलो क्याप्टेन रमा सिंह र वर्तमान क्याप्टेन एन्जिला तुम्वापो सुव्वाले संयुक्त रुपमा काठमाण्डौंमा लुम्बिनी कपको लोगो सार्वजनिक गरेका थिए । लोगोमा शान्तिका अग्रदुत भगवान गौतमवुद्ध र महिला फुटवल खेलाडीको चित्र राखिएको छ भने नेपाली राष्ट्रिय झण्डाको रङ्ग नीलो र सिम्रिक रातो प्रयोग गरिएको छ ।
नेपालगञ्जमा हुने लुम्बिनी कप महिला फुटबल प्रतियोगिताले बाँके र यस क्षेत्रमै नयाँ प्रतिभाहरुको उदय हुने विश्वास व्यक्त गर्दै बाँके जिल्ला फुटबल संघका अध्यक्ष भोजराज शाहीले प्रतियोगिता संचालनको काममा सबै तहतप्का जुटिसकेको बताउनुभयो ।
आयोजक अन्तरालका प्रमुख कार्यकारी शाहले बाँके जिल्ला फुटवल संघ र अन्तरालको संयुक्त प्रयासवाट लुम्बिनी कपले महिला फुटबलले साकार रुप लिन लागेको बताउनुभयो । उहाँले एन्फालाई विशेष धन्यवाद दिंदै लुम्बिनी कप महिला फुटवल पश्चिम नेपालकै गर्व गर्न लायक इभेन्ट वन्ने विश्वाससमेत व्यक्त गर्नुभयो ।
