नेपालगञ्ज, ९ पुस । बाँके राप्तीसोनारी गाउँपालिका वडा नं. २ टिकुलीपुरका वन्यजन्तु पीडीतहरुले राहत प्रक्रिया सजिलो बनाइदिन माग गरेका छन् ।
समुदायका लागि सञ्चार अभियान नेपाल (सीसीएन) ले गरेको गोलघर सम्वाद कार्यक्रममा पीडितहरुले राहत प्रक्रियामा अन्य कागजातसँगै स्थायी लेखा नम्बरको प्रावधान राखिएकाले कठिनाई हुने गरेको गुनासो समेत गरेका थिए ।
‘वातावरणीय न्याय र जवाफदेहिताका लागि सीमान्तकृत समुदायको सबलीकरण’ अभियानमार्फत वन्यजन्तु पीडितहरुको सहभागितामा गोलघर कार्यक्रम आयोजना हुँदै आएको छ । युएसएडको सहयोगमा द एसिया फाउन्डेशन मु्ख्य कार्यान्वयन संस्था रहेको युएसएड नागरिक समाज तथा सञ्चार कार्यक्रम अन्तर्गत कार्यक्रम आयोजना गर्दै आएको छ ।
कार्यक्रममा बिषय विज्ञ प्रकाश उपाध्यायले मानव र वन्यजन्तुबिचको द्वन्द न्यूनिकरण तथा राहत र बिमा सम्बन्धि प्रक्रियाका बारेमा सहभागिहरुलाई जानकारी गराउनु भएको थियो ।
