नेपालगञ्ज, १६ मंसिर । नेपाली कांग्रेस लुम्बिनी प्रदेश सभापति अमरसिंह पुनले संविधानसभा सदस्य एवम् कांग्रेस नेता स्वर्गीय अब्दुल हमिद सिद्दिकी (भोला) प्रति भावपूर्ण श्रद्धान्जली व्यक्त गर्नुभएको छ ।
यही मंसिर ३ गते ६० वर्षको उमेरमा दिवंगत हुनुभएका स्वर्गीय सिद्धिकीको नेपालगञ्ज गणेशपुर वडा नं. ४ स्थित घरमा भएको श्रद्धान्जली सभामा प्रदेश सभापति पुनले स्वर्गीय सिद्दिकी इमान्दार, जुझारु र कर्तब्यनिष्ठ नेता हुनुहुन्थ्यो भन्नुभयो ।
‘स्वर्गीय सिद्धिकीले नेपालको लोकतान्त्रिक आन्दोलनमा पुर्याउनुभएको योगदान नेपाली कांग्रेसले कहिल्यै बिर्सने छैन’— पुनले भन्नुभयो ।
नेपाली कांग्रेस वडा नम्बर ४ का कार्यवाहक सभापति ठाकुरप्रसाद शर्माको सभापतित्वमा भएको श्रद्धाञ्जली सभामा कांग्रेसका लुम्बिनी प्रदेश कार्यसमिति सदस्य टेकनारायण भुषाल, हरिश्चन्द्र श्रेष्ठ, बाँके कांग्रेसका कार्यवाहक सभापति गोपालप्रसाद अधिकारी, उपसभापति कृष्णबहादुर कार्की, सचिव सुधांशु कोइराला, कोषाध्यक्ष यज्ञ बहादुर बस्नेत, सहसचिव रेनुसिंह ठाकुरलगायतको उपस्थिति रहेको थियो ।
