नेपालगञ्ज, ७ मंसिर । आर्थिक अवस्था अति नै कमजोर भएका बाँके राप्तीसोनारी गाउँपालिकाका नागरिकले निशुल्क घर पाउने भएका छन् ।
गाउँपालिकाका प्राविधिक कर्मचारी दुर्गा केसीका अनुसार, केन्द्र सरकारको विशेष अनुदान सहयोगमा गाउँपालिकाको विपन्न आवास कार्यक्रम अन्तर्गत आर्थिक अवस्था कमजोर भएका विपन्न परिवारका लागि नयाँ घर बनाउन लागिएको छ ।
गाउँपालिकाका अध्यक्ष तप्तबहादुर पौडेलले गाउँपालिकाले चालू आर्थिक वर्षमा ५२ वटा घर बनाउन लागेको जानकारी दिनुभयो । ‘यो हाम्रो आफ्नै कार्यक्रम हो, तर यसमा केन्द्र सरकारको सहयोग छ’—अध्यक्ष पौडेलले भन्नुभयो ।
विशेष अनुदान रु दुई करोड ८० लाखको लागतमा घरहरु निर्माण हुनेछन् । पालिकाले एउटा घरको लागत रु पाँच लाख ३७ हजार ५५५ रुपैयाँ छुट्याएको छ । निर्माण गर्ने घरमा बरण्डा, दुई पक्की कोठा र जस्तापाताको छानो हुनेछ । शौचालय समेत सोही बजेटवाट निर्माण हुनेछ भने सेफ्टी ट्यांकी घरधनीले बनाउनुपर्ने प्रावधान राखिएको छ ।
घर निर्माणको ठेक्का भुँवरभवानी निर्माण सेवा र सौगात कन्स्ट्रक्सन ठाकुरबाबा बर्दियाले लिएको छ । प्राविधिक कर्मचारी केसीका अनुसार, वडा नं.३, ४, ५, ६ र ७ मा ३१ वटा र वडा नं.१, २, ८ र ९ मा २१ वटा घर निर्माण हुनेछ ।
गाउँपालिका अध्यक्ष पौडेलले घर निर्माणको धार्मिक विधिपूर्वक शिलान्यास गर्नुभएको छ ।
