नेपालगञ्ज, १३ कात्तिक । बाँके जिल्लाका विभिन्न पालिकाममा अलपत्र अवस्थामा रहेका पाँच जना सडक मानवहरुको उद्दार गरिएको छ ।
मानव सेवा आश्रम र आनी छोइङ डोल्मा फाउन्डेसनको संयुक्त आयोजनामा सञ्चालित मेची—महाकाली उद्धार यात्रा राष्ट्रिय टोलीले आज मंगलवार उनीहरुको उद्दार गरेको हो । उद्दार गरिएका पाँचै जनालाई सुर्खेतको वीरेन्द्रनगरस्थिन आश्रमको सेवा केन्द्रमा गृह प्रवेश गराइएको छ ।
पूर्वको मेचीवाट असोज २८ गतेदेखि शुरु गरिएको उद्दार यात्रा राष्ट्रिय टोली हिजो सोमवार राति नेपालगञ्ज आइपुगेको थियो । ‘यो पटकको चाडपर्वमा कसैले बस्न नपरोस् सडकपेटीमा’ भन्ने नारासहित उद्धार यात्रा सुरु गरिएको मानव सेवा आश्रमका संस्थापक अध्यक्ष राजजी अधिकारीले बताउनुभयो ।
‘हामीले नेपालगञ्ज उपमहानगरपालिका वडा नं. १८ वाट दुई जना, कोहलपुर नगरपालिका वडा नं. ११ वाट एक जना, जानकी गाउँपालिका वडा नं. ६ वाट एक जना र बैजनाथ गाउँपालिका वडा नं. १ वाट एक जना सडकमानवहरुको उद्धार गरेको हौ’—अध्यक्ष अधिकारीले भन्नुभयो ।
अध्यक्ष अधिकारीका अनुसार, उद्दार यात्राको आज १६औं दिनसम्म देशभरका विभिन्न स्थानवाट १३९ जना सडकआश्रित मानवहरुको उद्धार गरिएको छ । उद्धार गरिएका मध्ये १०६ जना पुरुष र ३३ जना महिलाको रहेका छन् ।
