नेपालगञ्ज, १२ कात्तिक । बाँकेमा गत तीन महिनाको अवधिमा डेंगी रोगका संक्रमितको संख्या ३४८ पुगेको छ ।
स्वास्थ्य कार्यालय बाँकेका किटजन्य रोग फोकल पर्सन दुर्गा गौतमले चालू आर्थिक वर्ष २०८१÷०८२ को साउनदेखि असोज मसान्तसम्म ३४८ जनामा डेंगी संक्रमण पुष्टि भइसकेको जानकारी दिनुभयो । ‘तीन महिनाको अवधिमा यति धेरै संख्यामा डेंगी संक्रमित हुनु चिन्ताको विषय हो’—फोकलपर्सन गौतमले भन्नुभयो ।
बाँकेका सबै अस्पताल र स्वास्थ्य संस्थामा गरिएका ल्याव परीक्षणबाट अहिलेसम्म उक्त संख्यामा डेंगी पुष्टि भएको बताइएको छ । बाँकेमा संक्रमित ३४८ जनामध्ये सबैभन्दा बढी १९५ जना नेपालगञ्ज उपमहानगरपालिकाका छन् ।
यसबीच, डेंगी रोग नियन्त्रणका लागि स्वास्थ्य मन्त्रालयबाट प्राप्त निर्देशन अनुसार खोज र नष्ट अभियान बाँके जिल्लामा पनि संचालन गरिएको छ । अभियान अन्तर्गत सरोकारवालाबीच अन्तरक्रिया, सहयोग तथा समन्वय सहितको एकिकृत कार्यक्रमसमेत संचालन भइरहेको जनाइएको छ ।
बाँकेका वडास्तरमा लामखुट्टेको बासस्थान खोजी गरी लार्भा र प्युपाहरु नष्ट गर्ने, विद्यालय तहका शिक्षक तथा विद्यार्थीहरुका स्वास्थ्य शिक्षा कार्यक्रम सञ्चालन गर्ने, बायोपेष्टिसाइडको प्रयोग गरी लामखुट्टेका लार्भाहरु नष्ट गर्ने, वडास्तरमा रहेका स्वास्थ्यकर्मीलाई अभिमुखीकरण कार्यक्रम सञ्चालन गर्ने, निजी तथा सरकारी स्वास्थ्य संस्थाहरुमा किटजन्य रोगहरुको डाटा भेरिफिकेशन गर्ने लगायतका कार्यक्रम भरहेको छ ।
