दाङ्ग(लमही), ११ कात्तिक । मानव सेवा आश्रम र आनी छोइङ डोल्मा फाउन्डेसनको संयुक्त आयोजनामा सञ्चालित मेची—महाकाली उद्धार यात्रा राष्ट्रिय टोलीलाई आज दाङ्गको लमहीमा स्वागत गरिएको छ ।
दाङ्गको लमहीस्थित मुख्यमन्त्री तथा मन्त्रीपरिषद्को कार्यालयमा आज आयोजित कार्यक्रममा लुम्बिनी प्रदेश सरकारका मुख्यमन्त्री चेतनारायण आचार्यले उद्धार टोलीका यात्रीहरुलाई स्वागत गर्नुभएको हो ।
त्यस अवसरमा मुख्यमन्त्री आचार्यले मानव मानवसेवा आश्रमले गरेको कामको प्रसंशा गर्नुभयो । मुख्यमन्त्री आचार्यले राज्यले गर्नुपर्ने काम आश्रमले गरेको बताउँदै आगामी दिनहरुमा आश्रमसँग साझेदारी गरि अगाडी बढ्ने प्रतिबद्धता समेत जनाउनुभयो ।
मुख्यमन्त्री आचार्यले भन्नुभयो—‘लुम्बिनी प्रदेशलाई सडकआश्रित मानवमुक्त बनाउन प्रदेश सरकार मानवसेवा आश्रमसँग सहकार्य गर्न तत्पर छ ।’
कार्यक्रममा आश्रमका संस्थापक अध्यक्ष रामजी अधिकारीले असोज २८ गतेबाट झापाको मेचीनगरदेखि शुरु गरिएको यात्राको १४ औँ दिनसम्मको अवधिसम्मपुग्दा १३० जना सडकआश्रित मानवहरुको उद्धार भएको जानकारी दिनुभयो ।
उद्धार गरिएकाहरु मध्ये १०१ जना पुरुष, २९ जना महिला, २ बालिका र १ बालक रहेका छन् ।
उक्त यात्रा टोली भोलि सोमवार नेपालगञ्ज आइपुग्ने कार्यक्रम रहेको छ ।
