नेपालगञ्ज, १९ असोज । बाँकेको राप्ती नदीमा निर्माण गरिने ‘बैकुण्ठधाम सिधनियाघाट’ का लागि आर्थिक सहयोग जुटाउन महोत्सव आयोजना गर्न लागिएको छ ।
आगामी कार्तिक २२ गतेदेखि ३० गतेसम्म स्थानीय रामलिला मैदानमा आयोजना हुने महोत्सबको पूर्व तयारीका लागि मूल समारोह समिति लागिपरेको छ । आध्यात्मिक महोत्सवमा वाचन प्रविण पण्डित दिनबन्धु पोखरेलको सहभागिता रहने जनाइएको छ ।
समितिले आज विहान नेपालगञ्जमा ’पत्रकार भेटघाट तथा शुभकामना आदानप्रदान कार्यक्रम’ गरेर महोत्सबलाई सफल बनाउने कार्यमा सहकार्य गर्न सबैलाई आग्रह गरेको छ ।
कार्यक्रमका प्रमुख अतिथि नेपालगञ्जका मेयर प्रशान्त विष्टले आध्यात्मिक महोत्सवलाई सबै बाँकेबासी मिलेर सफल बनाउनुपर्छ भन्नुभयो ।
मूल समारोह समितिका संयोजक डा. सुरेशकुमार कनौडियाको अध्यक्षतामा भएको कार्यक्रममा मेयर विष्टले महोत्सवप्रति सबैले अपनत्व लिनुपर्नेमा समेत जोड दिनुभयो ।
