नेपालगञ्ज, १९ असोज । हिन्दुहरुको महान पर्व विजया दशमी २०८१ का अवसरमा आज नेपालगञ्ज वडा नं. १३ बुलबुलिया शान्तिनगरमा शुभकामना आदानप्रदान कार्यक्रम गरिएको छ ।
बुलबुलिया शान्तिनगर टोल विकास समितिले गरेको कार्यक्रममा वडाका जनप्रतिनिधि, समितिका पदाधिकारी तथा सदस्यलगायत ठूलो संख्यामा स्थानीयहरुको सहभागिता रहेको थियो ।
कार्यक्रममा वडा नंं १३ का अध्यक्ष तथा समितिका संरक्षक सुरेशसिंह ठाकुरले नेपालगञ्ज उपमहानगरपालिका कार्यालयवाट प्राप्त हुने न्युन बजेटवाट वडाको समुचित विकास गर्न नसकिएको गुनासो पोख्नुभयो ।
अध्यक्ष ठाकुरले भन्नुभयो—‘बुलबुलिया शान्तिनगर टोल विकास समिति पनि वडा कार्यालयकै एक अभिन्न अंग भएकाले सकेजतिको सहयोग गर्न कुनै कसर बाँकी राखिने छैन ।’
टोल विकास समितिले माग गरे बमोजित सुरक्षाका दृष्टिकोणले वडाका संवेदनशील स्थानमा सीसी क्यामरा जडान र सरसफाईका लागि आवश्यक उपकरण लगायतका सामग्री छिटै उपलव्ध गराइने प्रतिबद्धता समेत जनाउनुभयो ।
समितिका अध्यक्ष नीरज गौतमको अध्यक्षतामा भएको कार्यक्रममा समितिका सल्लाहकारहरु विष्णु सुवेदी, कृष्ण अधिकारी, गोर्खबहादुर थापा, कोषाध्यक्ष बखतबहादुर कार्की, सचिव रामकुमार शर्मा, सदस्यहरु शशि देवकोटा, कैलाश देवकोटा, राजुविक्रम शाह, सतिश शाहलगायतका वक्ताहरुले पनि शुभकामना व्यक्त गर्नुभएको थियो ।
यसअघि समितिले आज बिहान टोलको सरसफाई गरेको छ । स्थानीय जेष्ठ नागरिक चक्रपाणी देवकोटाको घरदेखि उत्तर—पश्चिमको सडक, नालीको स्थानीयहरुले सरसफाई गरेका थिए । सरसफाई कार्यक्रममा समितिका पदाधिकारी तथा सदस्य र स्थानीयहरुको सहभागिता रहेको थियो ।
