नेपालगञ्ज, १५ भदौ । योग समिति नेपालले नेपालगञ्जमा १४५ जना योग प्रशिक्षकलाई दिक्षित गरेको छ । पछिल्लोपटक प्रशिक्षण लिएका १४५ जना दिक्षित गरिएको योग समिति नेपालकी उपाध्यक्ष सुमित्रा पण्डित सुवेदीले बताउनुभयो । यसअघि २१९ जना दिक्षित गरिएको थियो ।
आज नेपालगञ्ज वडा नम्बर १० गोसाइँ गाउँस्थित योग प्रशिक्षण केन्द्रमा भएको छैठौं दिक्षान्त समारोहमा चार महिनासम्म लगातार प्रशिक्षण लिएका योग प्रशिक्षकलाई दिक्षित गरिएको हो ।
दिक्षान्त समारोहमा सर्बोत्कृष्ट योग प्रशिक्षक २०८१ को पुरस्कार प्रशिक्षक अनिता कुमारी श्रेष्ठलाई प्रदान गरिएको छ । यस्तै विशिष्ट योग प्रशिक्षक २०८१ बाट इन्द्रा श्रेष्ठ पुरस्कृत हुनुभएको छ । योग प्रशिक्षक प्रेरक अवार्डबाट पनि आधा दर्जन बढी योग प्रशिक्षक पुरस्कृत भएका छन् । यसैगरी उत्कृष्ट तीन प्रशिक्षण केन्द्र व्यवस्थापन समितिमा पहिलो वडा नम्बर १० गोसाइँ गाउँ, दोस्रो वडा नम्बर २० राँझा र तेस्रो वडा नम्बर १८ कारकाँदो घोषित भएका छन् ।
पुरस्कृत हुने सबै प्रशिक्षकहरुलाई कार्यक्रमका प्रमुख अतिथि प्रतिनिधिसभा सदस्य एव्म राप्रपाका नेता डा. धवल शमशेर राणाले पुरस्कार तथा प्रमाणपत्र प्रदान गर्नुभएको थियो ।
दिक्षान्त समारोहमा नेपालगञ्ज मेयर प्रशान्त विष्ट, बाँकेका प्रमुख जिल्ला अधिकारी खगेन्द्रप्रसाद रिजाललगायतको उपस्थिति रहेको थियो । दिक्षान्त समारोहपछि समितिले सहभागि सबै जनालाई तीजको दर खुवाएको थियो ।
नेपालगञ्जमा केन्द्रीय कार्यालय रहेको योग समिति नेपालले बाँके, बर्दिया, सुर्खेत लगायतका जिल्लामा ३० वटा योग प्रशिक्षण केन्द्र सञ्चालन गरिरहेको समितिका अध्यक्ष गिरिराज शर्मा भट्टराईले जानकारी दिनुभयो ।
२०८१÷०५÷१५
