नेपालगञ्ज, ८ भदौ । नेपाली कांग्रेस बाँकेका सभापति नारायणप्रसाद गौडेलले पार्टीका कार्यकर्ताहरुले बाँके जिल्लामा संगठन विस्तार र जनताको सेवामा समर्पित रहनुपर्नेमा जोड दिनुभएको छ ।
बाँकेको राप्तीसोनारी गाउँपालिका वडा नम्बर ३ मा नेपाली कांग्रेसको वडास्तरीय कार्यालयको आज उद्घाटन गर्दै सभापति गौडेलले जनताको बलमा खडा भएको कांग्रेसको गौरवमय इतिहास जोगाउन कार्यकर्ताको काँधमा ठूलो जिम्मेवारी रहने गरेको छ भन्नुभयो ।
वडा नं. ३ का पार्टी सभापति शंकर महतराको अध्यक्षतामा भएको पार्टी कार्यालय उद्घाटन समारोहमा पार्टीका महाधिवेशन प्रतिनिधि लाहुराम थारु, जिल्ला पार्टी प्रवक्ता डिल्ली गिरी, राप्तीसोनारी गाउँपालिका उपाध्यक्ष मनिषासिंह थारु लगायतको उपस्थिति रहेको थियो ।
यसैबीच, बाँके कांग्रेसकै आयोजनामा भएको कार्यक्रममा राप्तीसोनारीको वडा नं. ३ मै रहेको जनजागृति आधारभूत बिद्यालय नवलपुरको प्राङ्गणमा धुपी, कपुर, अशोकलगायत विभिन्न जातका करीब ३०० विरुवा रोपिएको छ ।
