दाङ, ३० साउन । लुम्बिनी प्रदेश सरकारका वन तथा वातावरण मन्त्री बादशाह कुर्मीले कुहिएर गैरहेको काठको उचित व्यवस्थापन गरिने बताउनुभएको छ ।
दाङ्गको देउखुरीस्थित मन्त्रालयमा आज भएको वन क्षेत्रका सरोकारवाला निकायका प्रतिनिधिसँगको भेटवार्तामा मन्त्री कुर्मीले कुहिएर गइरहेका काठको उचित व्यवस्थापनका लागि घाटगद्धीको संरचनामा सुधार गर्ने मन्त्रालयको योजना कार्यान्वयनमा ल्याइनेछ भन्नुभयो ।
यसैगरी, आजै सामुदायिक वन उपभोक्ता महासंघ नेपालको टोलीसंगको भेटघाटमा मन्त्री कुर्मीले सामुदायिक वन क्षेत्रमा रहेका समस्याको समाधानको विषय मन्त्रालयको योजनाको उच्च प्राथमिकतामामा परेको जानकारी गराउनुभयो ।
सामुदायिक वन उपभोक्ता महासंघ नेपाल लुम्बिनी प्रदेश अध्यक्ष कल्पना भण्डारीको नेतृत्वमा आएको टोलीले वन क्षेत्रका नीति, कानुन र कार्यक्रममा सुधार गर्नुपर्ने विषयका बारेमा मन्त्री कुर्मीलाई सुझाव दिएको थियो ।
