नेपालगञ्ज, ३१ साउन । नेपाली काँग्रेसले बाँके जिल्लाका सबै वडाहरुमा सांगठानिक अभियान सञ्चालन गर्ने भएको छ ।
पार्टी जिल्ला सभापति नारायणप्रसाद गौडेलको अध्यक्षतामा आज नेपालगञ्जस्थित पार्टी कार्यालयमा बसेको जिल्ला कार्यसमिति बैठकले आगामी भदौ २४ गतेदेखि ६ महिने वडास्तरीय सांगठानिक अभियान सञ्चालन गर्ने निर्णय गरेको हो ।
बैठकपछि पार्टी जिल्ला प्रवक्ता डिल्ली गिरीले भदौ २४ गतेदेखि फागुन मसान्तसम्म जिल्लाका सबै ८१ वटै वडामा ‘जेष्ठ नागरिक, महिला र युवाको योगदानः पार्टी संगठन सुदृढीकरणमा बाँके कांग्रेसको अभियान’ कार्यक्रम सञ्चालन गर्ने निर्णय भएको गरिएको प्रबक्ता डिल्ली गिरीले जानकारी गराउनुभयो ।
अभियान अन्तर्गत जिल्लामा रहेका ८१ वटा वडाहरुको सांगठनिक अवस्थाको बारेमा जानकारी लिँदै वडा तथा टोलस्तरमा रहेका नेपाली कांग्रेसका अगुवा जेष्ठ नागरिक, महिला र युवाहरुको पहिचान गरी पार्टीप्रतिको भूमिका, सक्रियताको अवस्था विश्लेषण गर्दै उनीहरुलाई पार्टी संगठन सुदृढीकरणमा एकताबद्ध बनाउँदै लैजाने कार्यक्रम रहेको छ ।
त्यस्तै, स्थानीय तहबाट सेवा प्रवाहको अवस्था, विकास निर्माण, समुदायस्तरमा भएका सकारात्मक प्रयास, उपलब्धि र सुधार गर्नुपर्ने विषयमा जिल्ला तहबाट नीतिगतरुपमा पहलकदमी लिने, जनताबाट आएका गुनासो, सल्लाह–सुझाब संकलन र विश्लेषण गरी समाधानको लागि योजना बनाई अगाडि बढ्ने अभियानको उद्देश्य रहेको बताइएको छ ।
‘पार्टी बारे उठ्ने गरेको अनावश्यक भ्रमहरु चिर्दै नेपाली कांग्रेसको केन्द्र, प्रदेश र जिल्ला कार्यसमिति बाँकेले गरेका महत्वपूर्ण कार्यहरुको बारेमा समुदायस्तरमा जानकारी दिने, सामाजिक संघसंस्थाको गतिविधि र त्यसमा नेपाली कांग्रेस नेतृत्वको अवस्था विश्लेषण गरी आगामी रणनीति तयार गर्ने, भ्रातृ तथा शुभेच्छुक संस्थालाई सक्रिय बनाई नेपाली कांग्रेसको संगठन सुदृढीकरणमा टेवा पुर्याइने छ’—पार्टी जिल्ला सभापति गौडेलको भनाई छ ।
अभियानका लागि प्रतिनिधि खटाउने जिम्मेवारी बैठकले सभापति गौडेललाई नै दिएको छ । प्रतिनिधिका रुपमा जिल्ला कार्यसमितिका पदाधिकारी, सदस्यहरु, महासमिति सदस्य, महाधिवेशन प्रतिनिधि, सल्लाहकारहरु, पूर्व महासमिति÷महाधिवेशन प्रतिनिधि, पूर्व जिल्ला कार्यसमिति पदाधिकारी÷सदस्यहरु तथा पार्टीका भ्रातृ तथा शुभेच्छुक संस्थाका प्रमुखलाई खटाइनेछ ।
यसैगरी बैठकले ८१ वटै वडाका सभापतिहरुलाई बोलाएर क्रियाशील सदस्यता नवीकरण कार्ड वितरण गर्ने निर्णय पनि गरेको सचिव सुधांशु कोइरालाले बताउनुभयो ।
बैठकमा केन्द्रिय सदस्य मैकुलाल बाल्मिकी, संविधानसभा सदस्य अब्दुलहमिद सिद्दिकी (भोला) पनि उपस्थित हुनुहुन्थ्यो ।
