नेपालगञ्ज, ५ असार । नेपालगञ्ज वडा नं. ४ का वडा अध्यक्ष गोपाल पुन र उनका मतियारवाट नेपाल पत्रकार महासंघ, बाँकेको जग्गा कब्जा गर्न खोजिएपछि पत्रकारहरुले त्यसको कडा प्रतिवाद गरेका छन् ।
नेपालगञ्ज उपमहानगरपालिका वडा नम्बर ४ मा रहेको उक्त जग्गालाई वडाअध्यक्ष पुनको अगुवाईमा स्थानीय भू-माफियाले कब्जा गर्ने प्रयास गरेका हुन् ।
पत्रकार महासंघको अगुवाईमा बाँकेका पत्रकारहरुले जग्गा संरक्षणका लागि लिखितरुपमै स्थानीय प्रशासनको ध्यानाकर्षण गराएका छन् । आज जिल्ला प्रशासन कार्यालयमा पुगेको पत्रकारको टोलीले जग्गा अतिक्रमण रोक्न प्रमुख जिल्ला अधिकारी खगेन्द्र रिजाल ध्यानाकर्षणपत्र बुझाएको छ ।
ध्यानाकर्षणपत्र बुभ्दै प्रजिअ रिजालले घटनाका विषयमा कानुन बमोजिम कारवाही प्रक्रिया अघि बढाइने छ भन्नुभयो ।
तत्कालिन नेपालगञ्ज नगरपालिका (अहिलेको नेपालगञ्ज उपमहानगरपालिका) ले २०६६ भदौमा सर्वदलीय र सर्वपक्षीय बैठकको निर्णय अनुसार महासंघलाई कित्ता नम्बर ४३ को ०–२–१४१ र २ क्षेत्रफलको उक्त जग्गा भोगाधिकारका रुपमा उपलब्ध गराएको थियो । उक्त जग्गामा महासंघले दुई वटा भवन निर्माण गरेर कार्यालय समेत सञ्चालन गर्दै आएको छ ।
महासंघको भवनको पश्चिमतर्पmको जग्गामा भू-माफियासंग मिलेमतोमा वडाअध्यक्ष पुन, स्थानीय टोल विकास समितिका अध्यक्ष समेत रहेका माओवादी नेता कर्णबहादुर मल्ल नेतृत्वका केहि व्यक्तिले रातारात महासंघको जग्गामा रातारात पिसिसी सडक निर्माण गरेका छन् ।
उपमहानगरपालिकाले महासंघको जग्गा मिचेर बाटो नबनाउन निर्देशन दिदाँ दिदै पनि वडाअध्यक्ष पुनले बजेट दुरुपयोग गरेर जबरजस्ती रुपमा बाटो बनाउन लगाउनुले उनको भूमिकाप्रति शंका उत्पन्न भएको महासंघ, बाँकेका अध्यक्ष भण्डारीले बताउनुभयो । वडाअध्यक्ष पुन आर्थिक प्रभावमा परेर भू-माफियाको पक्षमा लागेको अध्यक्ष भण्डारीको आशंका छ ।
