नेपालगञ्ज, २५ जेठ । नेपाली कांग्रेस बाँकेको दोस्रो जिल्ला सम्मेलन भोलि शनिवार नेपालगञ्जमा हुँदैछ । सम्मेलनको सम्पूर्ण तयारी पूरा भएको काँग्रेसले जनाएको छ । सम्मेलनको कांग्रेसका नेता एवम् पूर्व महामन्त्री डा. शशांक कोइरालाले उद्घाटन गर्ने कार्यक्रम रहेको छ ।
सम्मेलन तयारीका सन्दर्भमा आज शुक्रवार आयोजना गरिएको पत्रकार सम्मेलनमा काँग्रेस जिल्ला सभापति नारायणप्रसाद गौडेलले जिल्ला सम्मेलनमा करीब एक हजार ५०० प्रतिनिधि सहभागी जानकारी दिनुभयो ।
‘सभापति गौडेलले भन्नुभयो—‘सम्मेलनमा पार्टीको जिल्लागत सांगठनिक प्रतिवेदन, आर्थिक प्रतिवदेन र बार्षिक नीति तथा कार्यक्रम प्रस्तुत हुनेछन् ।’
सम्मेलनमा प्रजातन्त्र सेनानी, अग्रज ब्यक्तित्व, समाजसेवी, पूर्व जनप्रतिनिधि, अग्रज नेता, प्रत्येक पालिकाबाट एक÷एक जना उत्कृष्ट कार्य गरेका वडा सभापति, तीन कार्यकाल वडा सभापति भइसकेका वा हाल वडा सभापतिको भूमिकामा रहेकाहरु, सहिद परिवार तथा जनआन्दोलन र द्वन्दमा अपाङ्गता भएका व्यक्तिलाई सम्मान गर्ने कार्यक्रम रहेको छ ।
त्यस्तै, शिक्षातर्फ सामुदायिक उत्कृष्ट विद्यालय, स्वास्थ्यतर्फ उत्कृष्ट संस्था र मानव सेवामा समर्पित संघ, संस्था गरी ६० बढी ब्यक्ति एवम् संस्थालाई सम्मान गर्न लागिएको छ ।
कांग्रेस बाँकेले १४औं महाधिवेशन पश्चात २०७९ चैत १८ गते प्रथम जिल्ला सम्मेलन गरेको थियो । नेपाली कांग्रेसको विधान बमोजिम नेपाली कांग्रेस जिल्ला कार्यसमिति बाँकेले गरेको निर्णय अनुसार जिल्लाभित्र रहेका वडा, पालिका, नगर, क्षेत्र र जिल्लाले बार्षिकरुपमा सम्मेलन गर्नुपर्ने व्यवस्था भए बमोजिम जिल्लाका केही वडा, पालिका र नगर बाहेक सबै वडा र क्षेत्रमा बार्षिक सम्मेलन सम्पन्न भएको बताउनुभयो ।
पत्रकार सम्मेलनमा वितरित प्रेस विज्ञप्तिमा आम कांग्रेसजन र बाँकेबासीले अनुभूति गर्ने गरी पार्टीको प्रभावकारी उपस्थिति गाउँगाउँसम्म पु¥याउन पार्टीपंक्ति क्रियाशिल रहेको उल्लेख गरिएको छ ।
पार्टी सुदृढीकरण अभियान अन्तर्गत ८१ वटै वडा सभापतिका लागि प्रशिक्षण तथा पाँच वटा पालिकामा पनि पलिकास्तरीय प्रशिक्षण कार्यक्रम सम्पन्न भएको, जाजरकोट र रुकुम पश्चिममा भूकम्प प्रभावितका लागि ५५ वटा घर–टहरा निर्माण गरेको, पार्टी संचालनका लागि लाभका पदमा रहेका ब्यक्तिहरुबाट प्राप्त लेबी बिधान अनुसार सम्बन्धित तहमा पठाउने काम शुरुवात गरेको विज्ञप्तिमा उल्लेख छ ।
त्यस अवसरमा सभापति गौडेलले पहिलो बार्षिक सम्मेलन सम्पन्न गरे पश्चात सुशील कोइराला स्मृति भवनको निर्माण कार्यलाई तीब्र गतिमा अगाडि बढाएको तथा तीन बर्षे लक्ष्य भए पनि एक बर्षमै करीब ७० प्रतिशत काम सम्पन्न भइसकेको जानकारी गराउनुभयो ।
पत्रकार सम्मेलनमा पार्टी उपसभापतिद्वय गोपालप्रसाद अधिकारी र कृष्ण बहादुर कार्की, सचिव शुधांशु कोइराला, सहसचिवद्वय रेनुसिंह ठाकुर र बिनोद थारु, प्रवक्ता डिल्ली गिरी, पार्टीका सल्लाहकार हुर्मत न्यौपाने, जिल्ला सदस्य लगायत अन्य नेताहरुको उपस्थिति रहेको थियो ।
