नेपालगञ्ज, २६ जेठ । नेपाली काँग्रेसका नेता डा. शशांक कोइरालाले नेपालमा लोकतान्त्रिक व्यवस्थाको अन्य कुनै विकल्प नभएको बताउनुभएको छ ।
नेपाली कांग्रेस बाँकेको दोस्रो जिल्ला सम्मेलनको आज नेपालगञ्जमा उद्घाटन गर्दै नेता कोइरालाले भन्नुभयो-‘लोकतन्त्रले आप्mनो उपचार आपैm गर्छ अनि स्वस्थ भएर अघि बढ्छ’, उहाँको थप भनाई थियो, ‘लोकतन्त्रका विरुद्ध जसले जति नै नानाभाँती फलाके पनि यो व्यवस्थालाई कसैले हल्लाउन सक्दैनन् ।’
दोस्रो जनआन्दोलनको जगमा उभिएर लेखिएको संविधान विश्वमै उत्कृष्ट रहेको बताउदै नेता कोइरालाले संविधानमा केहि कुरा छुटेका छन् अथवा केहि संशोधनका विषय छन् भने सल्टाएर जान सकिन्छ, तर संविधानको विकल्प खोज्न सकिदैन् भन्नुभयो ।
जिल्ला सम्मेलनमा सहमहामन्त्री किशोरसिंह राठौरले पार्टीले कार्यशैली बदल्नुपर्नेमा जोड दिदै काँग्रेस कमजोर भयो भने यो व्यवस्थाका बिरोधीलाई बल पुग्छ भन्नुभयो ।
पार्टीका केन्द्रीय सदस्यद्वय डा. गोपाल दहित र मैकुलाल बाल्मिकी, लुम्बिनी प्रदेश सभापति अमरसिंह पुन, पूर्व केन्द्रीय सदस्य गुरुराज घिमिरे, पूर्व जिल्ला सभापतिहरु किरण कोइराला, कृष्णमान श्रेष्ठ र गजेन्द्र हमाल, लुम्बिनी प्रदेश सदस्य अन्जना पाण्डे, क्षेत्रीय सभापतिहरु पोषण केसी, रमेशकुमार गुप्ता र मोहम्मद नकी खाँ लगायतले पनि बोल्नुभएको थियो ।
सम्मेलनमा जिल्ला सभापति नारायणप्रसाद गौडेलले बार्षिक नीति तथा कार्यक्रम, सचिव सुधांशु कोइरालाले सांगठनिक प्रतिवेदन र कोषाध्यक्ष यज्ञबहादुर बस्नेतले आर्थिक प्रतिवदेन प्रस्तुत गर्नुभएको थियो ।
त्यस अवसरमा प्रजातन्त्र सेनानीहरु, अग्रज ब्यक्तित्व, समाजसेवी, पूर्व जनप्रतिनिधि, अग्रज नेता, प्रत्येक पालिकाबाट एक÷एक जना उत्कृष्ट कार्य गरेका वडा सभापतिहरु, तीन कार्यकाल वडा सभापति भइसकेका वा हाल वडा सभापतिको भूमिकामा रहेकाहरु, सहिद परिवार तथा जनआन्दोलन र द्वन्दमा अपाङ्गता भएका व्यक्तिहरुलाई सम्मान गरिएको थियो ।
यसैगरी, शिक्षातर्फ सामुदायिक उत्कृष्ट विद्यालय, स्वास्थ्यतर्फ उत्कृष्ट संस्था र मानव सेवामा समर्पित संघसंस्थालाई सम्मान गरिएको पार्टी प्रवक्ता डिल्ली गिरीले जानकारी दिनुभयो ।
सभापति गौडेलको सभापतित्वमा सम्पन्न सम्मेलनमा उपसभापति गोपालप्रसाद अधिकारीले स्वागत मन्तव्य तथा अर्का उपसभापति कृष्णबहादुर कार्कीले धन्यवाद ज्ञापन गरेका थिए ।
