बर्दिया, २३ जेठ । बाँके युनेस्को क्लबले बर्दिया गुलरिया नगरपालिकास्थित दुई विद्यालयका बालबालिकालाई गर्मीको प्रभाववाट जोगाउन अत्यावश्यक सामग्री वितरण गरेको छ ।
युके एड स्टार्ट फण्डको सहयोग र कतार च्यारिटी नेपालसँगको सहकार्यमा सञ्चालन गरिएको तातो हावा परियोजना अन्तर्गत क्लबले गुलरियास्थित नेपाल राष्ट्रिय शम्भुशरण माध्यमिक विद्यालय र जानकी माध्यमिक विद्यालयका एक हजार २३० बालबालिकालाई छाता, पानी पिउने बोतल, जीवन जल (ओआरएस) र ग्लुकोज पाउडर जस्ता अत्यावश्यक सामग्री वितरण गरेको क्लबका अध्यक्ष रबि तुलाधरले जानकारी दिनुभयो ।
कार्यक्रममा गुलरियाका मेयर मुक्तिनाथ यादव, बिद्यालय व्यवस्थापन समितिका अध्यक्ष, वडा अध्यक्ष, प्रधानाध्यापक र शिक्षकहरुको सहभागिता रहेको थियो ।
यसैबीच, बाँके युनेस्को क्लब र कतार च्यारिटीको टोलीले उक्त विद्यालय परिसरमा जडान गरिएको वाटर कुलिङ सिस्टमको पनि अवलोकन गरेको थियो ।
यस्तै, अत्यधिक गर्मीले मजदुरी गर्न नपाएका नगरपालिकाका १५० विपन्न घरपरिवारलाई चामल, तेल, चना, सतुवा, पिठो, चिनी र अण्डा जस्ता खाद्यवस्तुहरू बितरण गर्नुका साथै उनीहरुलाई गर्मीबाट जोगाउन छाता, गम्छा, औषधि मिश्रित लामखुट्टेको झुल र चप्पल समेत वितरण गरिएको थियो ।
