नेपालगञ्ज, २१ जेठ । नेपाली काँग्रेस, बाँकेका सभापति नारायणप्रसाद गौडेलले नेपाली काँग्रेस र नेपाल प्रेस युनियनको सम्बन्ध नङ्गमासु जस्तै भएको बताउनुभएको छ ।
नेपाली काँग्रेस, बाँके प्रशिक्षण विभागको समन्वयमा युनियनको बाँके जिल्ला शाखाद्धारा आज नेपालगञ्जमा भएको प्रशिक्षण भेला उद्घाटन समारोहलाई सम्बोधन गर्दै सभापति गौडेलले काँग्रेसको शुभेच्छुक संगठनका रुपमा रहेको युनियनको लोकतान्त्रिक भूमिकाको पार्टीले सधै उच्च मूल्यांकन गर्दै आएको छ भन्नुभयो ।
‘युनियनमा आबद्ध पत्रकारहरुले मूलभूतरुपमा पत्रकारिता गर्ने नै हो, तर त्यो पत्रकारिता लोकतान्त्रिक पद्दतीमा आधारित हुनुपर्छ, जनहित र राष्ट्रहित अनुकुल हुनुपर्छ’-सभापति गौडेलले भन्नुभयो ।
बाँके काँग्रेसका उपसभापति एव्म संगठन विभाग प्रमुख गोपाल अधिकारीले संगठनमा आबद्ध हुने युनियनका सदस्यहरु अनुशासित र संगठनप्रति इमान्दार हुनुपर्छ भन्नुभयो ।
प्रशिक्षण भेलाको बन्दसत्रमा बरिष्ठ पत्रकार हेमन्त कर्माचार्य, उमा थापामगर, नवीन गिरीले नेपाली काँग्रेस र युनियनबीचको आपसी सम्बन्ध, पत्रकार महासंघमा युनियनको प्रतिनिधित्वका सवाल, युनियनको सांगठानिक संरचनागत व्यवस्था लगायतका विषयमा प्रशिक्षण दिनुभएको थियो भने पत्रकार महासंघ, बाँकेका पूर्व अध्यक्ष नीरज गौतमले प्रस्तुत विषयमाथि टिप्पणी गर्नुभएको थियो ।
युनियनका जिल्ला अध्यक्ष प्रियास्मृति ढकालको अध्यक्षतामा भएको कार्यक्रममा बाँके काँग्रेसका सचिव सुधांशु कोइराला, पत्रकार महासंघ बाँकेका अध्यक्ष दामोदर भण्डारी प्रेस युनियनका जिल्ला उपाध्यक्ष कमल खत्री, सचिव भिष्म लोधलगायतले बोल्नु भएको थियो ।
