बर्दिया, १९ जेठ । बर्दियाको मधुबन नगरपालिकामा स्थानीय एकीकृत पाठ्यक्रम सम्बन्धि तीन दिने कार्यशाला आयोजना गरिएको छ ।
प्लान इन्टरनेशनल नेपालको साझेदारीमा बाँके युनेस्को क्लब र मधुबन नगरपालिका शिक्षा इकाईको आयोजनामा सो कार्यशाला आयोजना गरिएको हो ।
बाँके युनेस्को क्लबको बालिका सशक्तिकरण परियोजना अन्तर्गत आयोजना गरिएको कार्यशालामा कक्षा १ मा अध्यापन गराउने मधुवन नगरपालिकाका अन्तर्गत विभिन्न विद्यालयका ३४ जना शिक्षकहरुको सहभागिता रहेको क्लबका कार्यक्रम संयोजक गोविन्द लामिछानेले जानकारी दिनुभयो ।
कार्यशालाका सहभागि शिक्षकहरुलाई एकीकृत पाठ्यक्रम र गुणस्तरीय शिक्षाको महत्व बारे आवश्यक सीप र ज्ञान दिइएको थियो ।
कार्यक्रममा मधुवन नगरपालिकाका उपमेयर अनिता चौधरीले विद्यालयमा गुणस्तरीय शिक्षा सुधार र एकीकृत पाठ्यक्रम लागु गर्न सबै शिक्षकलाई अनुरोध गर्नु भयो ।
त्यस अवसरमा मधुवन नगरपालिका प्रमुख प्रशासकीय अधिकृत मानबहादुर गिरी, सामाजिक विकास समितिका संयोजक मीनबहादुर थापा, शिक्षा इकाइ प्रमुख नारायणप्रसाद खनाललगायत वक्ताहरुले बोल्नुभएको थियो ।
कार्यशालामा शिक्षा इकाई प्रमुख खनाल र शंकरप्रसाद आचार्यले सहजीकरण गर्नु भएको थियो ।
