नेपालगञ्ज, १८ जेठ । नेपालगञ्जका सामुदायिक, संस्थागत र धार्मिक विद्यालयहरु असार ७ गतेसम्म बन्द हुने भएका छन् ।
नेपालगञ्जमा अत्याधिक गर्मी बढेको र नियमित गर्मी बिदाको समय मिलान गरी बिदा दिने निर्णय भएको नेपालगञ्ज उपमहानगरपालिका शिक्षा महाशाखाका प्रमुख गोर्खबहादुर थापाले जानकारी दिनुभयो ।
उखरमाउलो गर्मी र तातो हावाको बहाव अत्यधिक रहेकाले विद्यार्थीहरुको स्वास्थ्यलाई दृष्टिगत गरी नियमित समय अगावै गर्मी बिदा दिने निर्णय भएको हो ।
शिक्षा महाशाखाको क्यालेण्डर अनुसार, यस वर्ष जेठ २७ गतेदेखि असार १४ गतेसम्म गर्मी विदा दिने उल्लेख छ । तर, नेपालगञ्जमा गर्मी अत्यधिक बढेकाले त्यस अगावै बिदा दिने निर्णय गर्नुपरेको थापाले बताउनुभयो ।
महाशाखाले गत जेठ १५ देखि १८ गतेसम्म गर्मी बिदा दिएको थियो । तर, गर्मी कम नभएकाले त्यसैलाई निरन्तरता दिदै असार ७ गतेसम्म बिदा दिने निर्णय गरिएको हो । क्यालेण्डरमा उल्लेख भएको मितिभन्दा पहिला नै बिदा दिइएकोमा असार १४ गतेसम्मको समयलाई घटाएर असार ७ सम्म बिदा दिइएको जनाइएको छ ।
असार ८ गते शनिवार परेकाले अब नेपालगञ्ज उपमहानगरपालिका क्षेत्रका विद्यालय असार ९ गते खुल्नेछन् ।
यस्तै, अत्याधिक गर्मी बढेपछि बाँकेको डुडुवा गाउँपलिकाले पनि शुक्रबारदेखि पाँच दिनसम्म पालिका अन्तर्गतका सबै बिद्यालय बन्द गरेको छ ।
पालिकाका निमित्त प्रमुख प्रशासकीय अधिकृत अशोककुमार पाण्डेले जारी गरेको सूचनामा जेठ १८ गतेदेखि जेठ २२ गतेसम्मका लागि सम्पूर्ण शैक्षिक संस्थामा गर्मी विदा दिने निर्णय गरिएको उल्लेख छ ।
