नेपालगञ्ज, ६ जेठ । नेपालगञ्जमा सामुदायिक कुकुरहरुको बन्ध्याकरण गर्न थालिएको छ । नगरका २३ वटै वडामा २३० सामुदायिक कुकुरहरुको बन्ध्याकरण गर्ने लक्ष्यका साथ सामुदायिक कुकुर बन्ध्याकरण शिविर सञ्चालन गरिएको छ ।
होराइजन भेट क्लिनिक एण्ड पेट सप नेपालगञ्जसंगको सहकार्यमा नेपालगञ्ज उपमहानगरपालिका पशु सेवा शाखाले शिविरमार्पmत जेठ ८ गतेसम्म कुकुरको बन्ध्याकरण गर्न थालेको पशु सेवा शाखा प्रमुख लक्ष्मी शाहीले बताउनुभयो । ।
होराइजन भेट क्लिनिकका डा. शिव भुसाल र डा. सूरज थारुसहित चार जना डाक्टर र तीन जना प्रविधिक टोलीले बन्ध्याकरण गरिरहनुभएको छ । पशु सेवा शाखा प्रमुख शाहीका अनुसार, कुकुर छोप्न चार जना ‘डग क्याचर’ परिचालन गरिएको छ ।
सामुदायिक कुकुरको संख्या घटाउने, रेविज रोगको संक्रमण न्युनीकरणमा मद्दत गर्ने, कुकुरबाट मानिस र अन्य जनावरमा सर्ने विभिन्न रोगहरुको संक्रमण कम गर्ने तथा सामुदायिक कुकुरलाई शान्त बनाउने उद्देश्यका साथ नेपालगञ्ज उपमहानगरपालिकाले प्रत्येक वर्ष बन्ध्याकरण शिविर चलाउँदै आएको छ ।
यसैबीच, नेपालगञ्ज रामलिला मैदानस्थित नारी विकास केन्द्रमा चलिरहेको शिविरको आज अनुगमनसमेत गरिएको छ । नेपालगञ्ज उपमहानगरपालिकाका प्रमुख प्रशासकीय अधिकृत ओमबहादुर खड्का, पशु सेवा शाखा प्रमुख शाही लगायतले अनुगमन गर्नुभएको थियो ।
